Custa est una cantone chi apo iscritu calchi die a como. Fit dae tempus chi pensaia a calchi cosa comente una marcia, pro ischidare sos sardos, pro lis faghere cumprendere ite sutzedet in sa terra nostra. A boltas parimus de aberu thurpos e surdos. Ma, sigomente no sò nè una cantante nè una musicista no mi beniat in conca nudda. Poi ,apo pessadu a s'innu de sa Brigata tataresa, a sa balentia patriotica de cussos giovanos sardos chi andaiant a cumbatere e a morrere pro sa patria issoro. S'Italia. E tando mi sò preguntada -pruite tota custa energia pro s'Italia ebbia? Pessamus prima de totu a nois, a sa Sardigna. A su bene de sa terra nostra. Custas pagas rimas sunt de cantare cun sa musica e su ritmu de sa brigata tataresa, chi totu connoschent, ma cun un'ispiridu de paghe e non de gherra. Est un'ocasione pro unu meledu, pro nos abbaidare a s'ispijiu e pro nos preguntare comente mai sunt sempere ateros chi detzident pro a nois.
In custas dies su Presidente Soru est fatende pro sa Sardigna una gherra pretzisa pro aere cussu chi nos cumpetet in tremenes economicos. Cherimus chi si sigat gai, pro faghere intendere sa boghe nostra e pro aere totu cussu chi nos ispetat, e chi pro annos e annos sos sardos no ant mai pedidu cun fortza.
Cheret a non timire contras a sos poderes fortes de Roma. S'ispera est chi su Guvernadore torret in Sardigna de binchidore e sigat a faghere su mantessi, finas cando su Guvernu de Roma at a mudare ala politica movende dae tzentru dresta a tzentru-manca.
Isperamus in una Sardigna pius forte e pius Natzione, cudda chi totu sos sardos cherent e chi non ant mai apidu sa balentia de dimandare a boghe manna.
Cantade bois, como a boghe manna!
Daniela Sanna
AIO' SARDOS!
Populu sardu chi ses una Natzione
Como s’Italia la faghet de leone
Su tzentru-dresta comente tzentru-manca
Non ti dant nudda e la faghent sempre franca
Aiò, dae su sonnu ischida
Bennida est s’ora de una patria pius unida
S’Autonomia no est pius de unu bisu
Sa classe ghiadora nos at divisu
Contende faulas e Fatende promissas
nos ant cunvintos chi semus italianistas
Aiò, dae su sonnu ischida
Bennida est s’ora de una patria pius unida
Colonizados e italianizados
paris cun sa chimica, nos ant coglionados
dae Logudoro finas a Campidanu
montes, tzitades e biddas de su pranu
Aiò, dae su sonnu ischida
Bennida est s’ora de una patria pius unida
Sa gioventude pro si che ammodernare
chena cussentzia si faghet cumplessare
como s’ispera est sa televisione
faghent velinas e cursos de ditzione
Aiò, dae su sonnu ischida
Bennida est s’ora de una patria pius unida
E cando andant a s’universidade
Isperant sa Sardigna de poder ismanniare
Si non sunt fizos de familias potente
Cun sa bravura non cumbinant niente!
Aiò, dae su sonnu ischida
Bennida est s’ora de una patria pius unida
Est tempus como de aberrere sos coros
E de defendere limba e battor moros
Benint dae fora pro totu cumandare
mare e muntagna nos cherent ocupare
Aiò, dae su sonnu ischida
Bennida est s’ora de una patria pius unida
Sardos unidos pro sa mantessi paghe
Nudda prus NATO né bases militares!
Roma furona paga su chi cumpete
Sos decimòs non sunt bator ma sunt sete
Aiò, dae su sonnu ischida
Bennida est s’ora de una patria pius unida
Dae sa Sitzilia nos narant de copiare
Su mantessi sardu, peruna dignidade !
Chi sa Sardigna este s’ultima fiza
Cussu l’ischimus, ma a nois non s’assimiza
Aiò, dae su sonnu ischida
Bennida est s’ora de una patria pius unida
Sa globalizazione nos cheret totu uguales
Tenimos galanias e giassos naturale
Nuraghe e monumentos nemos at iscobertu
Podimus diventare museu a chelu abertu
Aiò, dae su sonnu ischida
Bennida est s’ora de una patria pius unida
Como sos sardos no cherent aisettare
E nois Natzione devimus diventare
Su Istatutu si devet mudare
Aiò, o sardos, ainanti fortza impare!
