Fragu de dinai….
A bortas su dinai tenit fragu prus bellu de su de su pani bessíu immoi-immoi de su forru.
Balla, 4 miliardus de francus nous! Dinai nostru! Dinai chi non depeus pediri a nemus!
Pani chi su stadu italianu si nd’at furau de buca e immoi nde ddu depit torrai.
Soru at nau ca si ddu fait torrai cussu dinai. Dd’at nau e immoi ddu depit fai…
In su giornali ant scritu ca Soru e Tremonti fiant acanta de s’arropai.
Mi dda biu sa scena: Soru imperendi sa “fronte utilmente spaziosa” a sa sarda…
Mancai po custu sceti Soru minescit de intrai in sa storia. E deu insaras ddi nau:
“O su presidenti, candu est aintru, abarrit atentu a aundi ponit is peis!”
Cussu dinai, candu nd’at a furriai a domu, at bolli pratziu e custa borta tocat a bogai su dinai po sa lingua sarda: totu su dinai chi serbit.
Immoi tocat a bessiri a campu cun unu programma de politica linguistica de sa R.A.S. Su guvernu regionali depit nai craru su chi bolit fai po sa lingua nostra. Non bastat a essi postu impari una cummissioni noa po sa lingua e a essi arribbaus a una proposta de lingua scrita po sa Regioni. Cussa est sceti sa basi minima po podi incumentzai. Su sardu depit essi una lingua “normali” e is linguas normalis costant dinai: dinai po s’universidadi, po sa scola, po is giornalis, po sa televisioni, po is libbrus, po is documentus uficialis…
A su guvernu regionali ddi spettat immoi a nai cantu dinai bolit spendi po sa lingua e a is intelletualis e a is politicus sardus ddis spetat a nai comenti custu dinai iat a bolli spendiu.
Serbit unu programma po sa lingua e duncas sa primu cosa de fai est a organizai una cunferentzia programmatica. Spereus de non depi abetai annus. Su dinai non est furriau ancora, est berus, ma is ideas—a su mancu in Sardinnia—funt ancora a gratis.
Fintzas a immoi su guvernu regionali at tentu unu cumportamentu ambiguu in custa chistioni. Bellas decraradas de principiu e atus simbolicus che su de sa cummissioni noa e de imperai su sardu in pubblicu, ma in su propriu tempus seghendi giai-giai totus is finantziamentus a sa lingua e a sa curtura sardas.
E sa petrollirica e su jazz finantziaus cun su dinai de sa curtura.
Petrollirica e jazz fatu in cudda manera non funt curtura, ma “promozione turistica”: fiat s’assessorau a su turismu chi depiat pagai!
Sa scusa fiat ca dinai non nci ndi fiat, ma fiat una scusa.
Sa beridadi est forsis ca sa “lobby” anti-sarda est ancora forti meda e ca Soru non si dd’est intendia de si ponni contras a issus. Ma immoi ddi tocat a scioberai.
Scioberai po su sardu bolit nai a scioberai de fai cresci sa curtura sarda e una bisioni sarda de is probblemas nostrus. Custu bolli nai a scioberai de fai nasci una “classe dirigente sarda” e non “italiana, ma operante in Sardegna per conto dei poteri italiani”, comenti est sempri stetiu.
Scioberai po su sardu bolit nai a ndi segai sa basi de su poderi de custa genti chi s’at donau sa petrolchimica, s’Ente Lirico, su turismu bardaneri, is basis militaris, sa “dispersione scolastica” a su dopiu de sa media italiana, sa disoccupatzioni a su 17% (113.000 disocupaus a su chi narant is sindacaus), su suta-svilupu eternu in una regioni suta-populada, sa dipendentzia curturali e psicologica—e duncas economica—eterna.
Custa genti campat e s’ingrassat de sa dipendentzia de is sardus: issus mediant tra is sardus e is poderis italianus. A chini serbint? A issus e totu!
Sa dipendentzia curturali e psicologica—e duncas economica—a issus ddis serbit po abarrai aundi funt: setzius gosendi-si sa rendita parassitaria chi ddis spetat, ca funt fendi is interessius issoru…
In is annus ’50 e ’60 is sardus emigrant inniorantis, immoi emigrant laureaus…
Laureaus de 30 annus chi bivint ancora in domu de su babbu, ca funt disocupaus…
Laureadas trabballendi che cummissas in is centrus commercialis…
Bellu proggressu s’at portau sa curtura italiana!
S’economia dda fait sa genti. Sa genti est sa chi produsit arrichesa. Un’economia avantzada tenit abbisongiu de una curtura avantzada—de genti chi tenit una curtura avantzada—ma un’economia auto-centrada tenit abbisongiu de una curtura auto-centrada—de genti chi tenit una curtura auto-centrada—. Fintzas a candu is sardus ant essi dipendentis de sa curtura italiana, puru s’economia sarda at essi suta-svilupada. Chentza curtura sarda, nudda economia sarda!
A ita serbit insaras su sardu? A fai dinai! A donai trabballu! A ponni in pei un’economia ghiada de genti chi connoscit e cumprendit sa terra sua!
Cantu at a costai in tempus e dinai?
Meda! Su chi costat in tempus e dinai a pesai unu fillu!
