12/11/2004 In pagas dies cumprit una grandu novidade
Soru s'impignat pro sa limba
Soru bisitat a Giuanne Lilliu, andat a su cungressu de sos sardistas e s'impignat a fàghere polìticas pro sa limba.
Totu in pagas dies. S i su presidente muntennet su chi at nadu pubblicamente, semus propriu lòmpidos a sa furriada chi s'isetaiat in contu a sos sèberos de su Guvernadore in matèria de limba.
Renato Soru, sabadu a merie coladu, est andau a Arborea, inue sos sardistas fint riunidos a cungressu. At fatu una parlata de sas suas faghinde a cùmprèndere chi sas fainas suas de guvernu sunt prus o mancu sardistas, e duncas ite bi faghet su Partidu Sardu a s'opositzione? In prus, su presidente de Seddori at agghiau cussa chi pro nois est sa "svolta" in argumentu de limba. Su capu de s'esecutivu regionale at assiguradu chi sas lezes de su bilinguismu ant a èssere applicadas in totu e chi su sardu at a èssere "limba ufitziale de sa Regione". Decraratzione tàtica pro custringhère sos sardistas a intrare in su guvernu? Promintas de marineri de su mare polìticu?
A cantu paret, no. Si podet dare chi Renato Soru si nche siat abberu cunvintu de s'importantzia de sa chistione limbistìca si est beru su chi at iscoviadu Paulu Pillonca in s'aboju de Sèdilo aparitzadu pro presentare sa proposta de "Limba de Mesania". <Su guvernadore - at nadu Pillonca faeddende a su pùbblicu - est andadu a domo a bisitare a su professore Lilliu chi aiat fatu un'apellu pro votare a Soru in campagna eletorale. L'acumpanzaiat Giovanna Cerina. Paret chi Lilliu si nche siat chensciadu cun Soru pro ca at ismentigadu sa limba in s'atzione de guvernu e chi su Presidente apat promintu de rimediare".
Duncas, sa pesada chi su Guvernadore at fatu in Arborea podet èssere unu proponimentu sèriu de cherrere fàghere carchi cosa po acuntentare a Lilliu. Tzertu, si custu est cumbinadu, Soru at a dèpere cambiare cosas medas in sa linea de s'assessora de s'imparu pùbblicu Elisabetta Pilia. Pro non contare chi in domo sua, in Progetto Sardegna, bi tenet intellettuales chi sunt contras calesisiat polìtica limbistica pro sa limba. Ma at tentu fintzas cìrculos chi si nche sunt chensciados pro sa farta de polìtica pro sa limba.
A donzi modu, andant deretos currezidos in consizu regionale sos "taglios" ammanizados (dae chie?) in s'assestamentu de bilanciu pro sa leze 26, e andant torrados a pònnere in motu sotzios e sogetos ativos de sa polìtica limbìstica chi est frimma dae su mese de Capudanni 2003. Si Soru at promintu, nois bi credimus. Ma chi non siant comente sas promintas de Berlusconi pro imbasciare sas tassas...
