Narant chi no est beru chi su sardu piaghet e interessat a sa zente. Narant chi in tzitade niunu lu faeddat, o lu cumprendet pius. Narant chi sa zente no est interessada a lu lèzere o a l'imparare puru, posca de no lu aere imparadu in domo….. …..Ma, lu narant o nos lu faghent creere ebbia? Custa pregunta m'est asciada a conca candu, s'atera die, pro cumbinascione, appo assistidu a una presentada a subra de unu lìberu iscritu totu in sardu.
Su pùblicu no fit numerosu, ma pretzisu pro sa mannaria de s'aposentu inue fit apparitzadu, e m'est palfidu interessadu meda.
Fit unu publicu misciu de omines e femminas de sas biddas e finas de tzitade. Pro su pius fint de unu sotziu cun s'amore pro sa bicicletta e s'ambiente. E difatis fit de custu chi su lìberu faeddaiat. Sa cosa pius interessante peroe, fit chi cussa zente s'agataiat igue pro intèndere faeddare de sa passione sua, sa bicicletta, ma at finidu pro s'interessare de pius candu calecunu at cumenzadu a faeddare in sardu e de sardu.
A cumintzu calicunu s'est ispantadu e at finzas àpidu de murrunzare, posca, at intesu lèzere una pazina de su lìberu, e, cando s'est fatu su dibatu a subra de sa limba sarda, e ant intesu chi s'est molzende, chi sos sardos la sunt ilmentichende, sos coros si che sunt iscaldidos. Fint totu a favore de sa limba. Sos cagliaritanos puru!
Appo chelfidu iscriere custa esperièntzia mea proite so cunvinta, oe pius de eris, chi sa faina de sa limba interesset totus sos sardos, finzas cussos chi no b'ant pessadu mai innantis, ma chi ant unu ligàmene cun sa terra e sas raighinas issoro, dae calesisiat bidda o tzitade de Sardigna. Bisonzat de che lu ispiegare ebbia. Est netzessariu a impitare sa manera pretzisa pro los apassionare, fintzas cumintzende dae ateras fainas, pius modernas e pius acultzu a sa vida de oe in die. Ma, pro istransire custa possibilidade, cussos chi pessant chi a niunu l'interesset sa limba, s'ifachetant meda. Bastat a biere cantu faeddant de limba in sos giornales e televisiones sardas.
