12/11/2004 Retzensiones - Su lìbberu de Ivo Murgia
Contus Africanus in Sardu Foghile
de Antoni Maria Pala
In d-una serentina frita, de cussas atonzinas chi bos faghent disizare su gosu ‘e sas paraulas contadas, si che istudades sas intumbidas de sos recrames e quiz de sa televisione, e imbetzes bos allumades unu bellu fogu, mascamente si tenides unu piseddu de apentare, leade in cussideru sa pessada de bos seberare una paristoria.
Ma lassademi narrer, innantis de agabare de pessare chi su chi bos so nende siat sa matessi cantone chi: pro esser sardos bonos tocat de torrare a su connottu, a su casu martzu, e similes retrogas abusadas, mancari in forma literaria...
Una paristoria, fio nende.
Si poscas de pagas rias su piseddu chi tenides a costazu, in su banchitu bassu, che agabat de si bortare che iscatula a su chirru de sa televisione e intames, a ogros allutzighinados e cun sa buca aberta dae s’ispantu, isetat che cosa licanza sas paraulas chi sezis lezende, cheret narrer chi no solu est piaghende a issu, su contu, ma finas bois sezis ingaiados dae su chi nades.
E si martinicas e pisches cristianinos, intundiados dae leones a murrunzu, in renas grogas de oro o trumas de sordados nieddos current in sa ria de tumbarinos a cunsonu intro padentes birdes chena lacana, tando, a bisu meu, che sezis imbertos in atera cussorja.
Sa maja de su contare!
Cheret narrer chi Ivo Murgia cun sa pinna sua manerosa, paris a sas pinturas de Massimo Congiu, a leadu a bois e a su piseddu a passizu a manu tenta, in sas campuras isteremadas de sa Nigeria, Mali, Zambia, Togo, Senegal e Tanzania.
Ma pruite custa bortadura de contos de sa traditzione africana in sardu? Narat in sa presentada Ivo Murgia, da chi totus cumprendent s’italianu e in cussa limba operas che a cussa bi sunt giai?
Est unu cumbidu a nos fagher meres de sa curtura istranza colendela, innantis, in su sedatu de sa nostra e incunzende sos balores poscas de una mirada cun ogros sardos.
Sa tradutzione, nos ammentat Ivo Murgia, est una manera cumprida pro su cunfrontu e pro sighire a dare dignidade literaria a una limba chi cheret crescher.
Bella s’iscritura e su manizu de sa limba, in Contus Africanus. Deghile sa grafica e bellas sas pinturas chi acumpanzant su contare cun impreu de mazines craras subra a sa prospetiva lebia de sos jassos mentovados.
