15/11/2004 Rassigna de s'imprenta - Novas de su comunu de Sèneghe
"Est semper mezus sa cosa fata in domo"
de Boreddu Cubeddu
"Slow food", foeddu inglesu, in italianu dhu podeus furriae in "cibo lento", tantu po narrede ca, po papae bene, non bisonzada a papae impresse, comente si faede in cittade, papande e fuende. Custos duos foeddhos sunt su numini de unu sotziu naschiu in Italia po s'opera de Carlo Petrini, chi dae pagu at fintzas apertu una universidade de Scienza dell'Alimentazione. Unu sotziu chi in Seneghe connoscheus poita at organizzau cunferentzias in bidda in custos urtimos chimb'annos po arresonae a favore de sa petza, s'ozu, s'abba, su binu, su casu: insomma, po si narrede ca est ora de appreziae sa cosa chi de semper noi feus e papaus in domo.
Poita ndhi foeddaus oe? Po su fatu ca istechida, in Torino, "Slow food" (cun s'azudu de su Guvernu, de sa Regione Piemonte, sos Comunos, sa Coldiretti) at fatu bennede dae totu su mondu chimbimila messaios cun sos benes issoro. Africanos, Indianos, Americanos, zente de s'Afganistan comente de sa Mogolia (Asia), Italianos, Europeos: zente comente sa nosta, comente nois, chi sighidi a faede trigu, arrosu, ozu…. burduras, comente unu tempus, ma totus cun "food" (cos'e papae) e chi, si non agattada unu mercau, est destinau a finidi. Totu unu mundu chi s'industria de sitepapae at derrutu, po lassae su logu a sos benes chi bideus e intendeus in propaganda de sa televisione, ma chi seus iscoberende marefatas apustis de sos dannos fatos dae sa "mucca pazza" e atiros benes non cuntrollaos de su cumerciu. A s'atopu de Torino dhia fuidi s'ozu e sa petza de bidda, impare cun atiros de su Montiferru e Sinis. In sas dias de sa "Terra Madre". Cosas chi faent penzae e isperae chi su chi triballaus agattede su meritu sua. E su triballu benzet pagau comente si meritada..
