20/11/2004 Parris intreveraus a pitzu de sa lingua
Eya, tocat a s'atobiai !
de Càralu Mura
Saludi,
deu puru seu di acòrdiu cun Francesca: si depeus atobiai totus imparis, donniunu
cun su sardu suu, cun sa bisura sua, cun is bideas suas, perou a su mancu cirkendi de traballai e gherrai po s'adelantamentu 'e su sardu.
Su sardu tòcat a du fueddai de prus in sa Telebisioni, in is arràdius, in is tiatrus... Tòcat a si ponni totu paris po spingi is polìtigus a du fai
intrai in is domus...
Donnyunu kistionendi su sardu suu...
Po nai, deu no nci creu a unu sardu comunu fatu "a taulinu", ma creu ki
su sardu, in su benidori, at a essi unu sardu amesturau: ma ki no si atobiaus e traballaus impari, su sardu at a morri, e
de pressi puru...
E candu aparìçanta "congressus" o presentadas ki kistiònanta de Lìngua,
Curtura,
Identidadi, e aici nendi, a su mancu ki du fètzant in sardu...
Po custas eletzionis puru totu is polìtigus si funti prenus sa buca de-i custus fueddus: de Dereta a Manca.... e ita anti fatu?
Deu du nau de manera crara: deu no tengu cunfiantza in kini kistiònat de
"curtura, identidadi, lìngua" e du fàit in italianu.... no creu a su dinau ghetau a s'àliga po fai benni studiosus de foras.... sa meixina si da depeus
circai in sa potekeria nosta, si da depeus fabrigai nosu e totu... nosu:
totu is sardus, no is "studiaus" o is "spertus de lìngua" sceti, ki sèrbinti,
ma poi seus nosu a depi pigai una decisioni i a si nci movi.
Bolemu fai una pregunta: ma a is trumas ki fàinti i aparìçanta spetàculus in
sardu, ke cumèdias, monòlogus, i aici nendi, cantu dinai di dònanta?
E is pipius e is piçokeddus de is iscolas, dus acumpànjant a biri custa genia de spetàgulus?
Tòcat a s'atobiai sciendi ki nisçunus tènit sa "Arrexoni" e sa "Beridadi",
ma ki s'adelantaus cun su "cunfrontu", acarendisi' intr''e nosu e totu!
A si biri luegus
Càralu Mulas
CB: bolemu torrai gràtzias a-i custu jassu ki si permìtit de s'acarai de
manera lìbera.
