Su disinnu de lege de ratifica de sa Carta Europea de sas limbas est istau rinviau in sa setziada de su primu de su mese de martzu cando su senadore de sa Lega Stiffoni at presentau una arrechesta de tasidura. Su de arretzire sa Carta est una cunditzione arrechestas dae is istitutziones europeas, massimu dae su Consigiu de Europa, po sas intradas noas in s'organismu comunitariu. Faghet fastigiu, tando, chi s'Italia ca est unu paisu fundativu no dd'apat galu arretzida. Andat isplicadu peroe ca s'Italia, innantis galu de ratificare sa Carta at aprovau sa lege 482/1999. Su disinnu de lege, torrau a imbiare in cummissione, tenet sèmperecando, in prus de s'autorizatzione a sa ratifica, àteros disponimentos collegados de interessu mannu: a s'artìculu 5 prevedit de aviare mesuras impunnadas a assegurare sa difusione radiutelevisiva de sa limba friulana e sarda fintzas cun s'impreu de frecuentzias dedicadas. Sa motivatzione de su rinviu (su fatu chi in s'istatutu de su Venetu ddue siat arreconotta sa limba regionale veneta) est istada, a parre nostru, un'iscòticu làdinu làdinu. Difatis, in s'artìculu 2 de sa lege costitutzionale chi aprovat s'istatutu de su Venetu sa "limba veneta" no est mancu nomenada. Cussu articulu gighet intames : <... La Regione concorre alla valorizzazione del patrimonio culturale e linguistico delle singole comunità..>, unu afirmu de una banalidade e generalidade gasi manna chi de seguru no aiat aere custrintu su guvernu a gastos prus mannos ne a impignos finantziarios non prevedidos. Su fatu est ca su Senadu cheriat unu iscòticu calesisiat po non aprovare sa lege e dd'at agatadu. Cando a s'Itàlia ddi cumbenit a sighire s'Europa (bie su casu Suez-Enel) nde ghetat sa domos a a boghes, cando no ddi cumbenit si callat a sa muda e faghet dannu. De sa ratifica de sa Carta nd'aus a faeddare torra in sa legisladura chi enit. In su programma de s'Unione de tzentru-manca, pro sas limbas de minoria ddue sunt tre rias ebbia chi non cherent nàrrere nudda: no est unu cumintzu bonu.
