Politicos meda e sa Cheja puru, ant nadu e sighint a narrere a sa zente
chi su 12 e 13 de lampadas at a essere menzus si diant a andare a su mare
a leare unu pagu de sole, e de no andare a votare pro su referendum abrogativu.
Su referendum pius mentovadu e su pius importante puru, est cussu pro isburrare
(cancellare) 4 articulos de sa leze 40 a subra de sa fecondatzione assistida.
Cussu de cunsizzare a sa zente de non votare est una faina grave meda, chi
cheret cantzellare 500.000 frimmas, a su nessi. Ma pro sa leze 40/2004 nde
sunt istadas boglìidas pius de unu milione de tzitadinos chi cherent mudare
sa leze e cantzellare sos articulos in discussione.
Su dovere e su dirittu tzivile de andare a votare pro seberare unu sì o unu
no comente risposta a su referendum devet essere rispettadu dae tottus. E
diat dever essere rispettada puru sa libertade de cussentzia de sa zente
e tzertos problemas pessonales e familiares chi custa leze andat a toccare.
A custu referendum diant a devere andare a votare totus. Siant cussos chi
no ant mai àpidu problemas a aere fizos, sia cussos chi a dolu mannu no resessint
a los tennere.
Est unu referendum particulare meda pruite custa leze non toccat a totus
e pro cussu zente meda no s'est informada e no ischit ancora si andare a
votare o nono.
Ma chie est tocadu dae custa leze suffrit meda pro non pòdere essere pius agiudadu dae sa chirca e dae sa meighina chi aiant fattu passos a innanti
pro sos problemas de infertilidade de sa coppia e pro sas maladias geneticas
a intru sa coppia ettotu. E suffrit meda de pius pruite ischit chi s'isseberu
de sa zente chi no at a andare a votare at a essere determinante puru pro
sa vida sua e de sos fizos chi disizat e chi no resessit a aere.
E tando tocat a non essere egoistas, e pessare chi custos problemas podent
capitare a totus, fintzas a nois, a sos fizos nostros, a sos nepodes
nostros, a sos amigos, a sa familia nostra, a su ighinu e' domo e gai a innanti.
Sas coppias a die de oe sunt pius betzas cando si cojuant. Sa vida nostra
est sempre pius istressada, e ateras motivasciones podent gighere a s'isterilidade
o a sa dificultade de àere fizos. Candu duas pessonas si cherent bene,
s'istimant, tando cherent faghere una familia e cherent aere fizos issoro. Pruite
s'Istadu (e sa Cheja), devent frimmare sa possibilidade de faghere chircas iscientificas
o impitare tecnicas noas pro dare a una coppia sa felitzidade de aere unu
fizu? Pruite cussas coppias chi gighent problemas de maladias
geneticas, comente podet essere sa talassemia (anemia mediterranea) no podent impitare
pius (dae s'annu passadu cun sa leze 40) sas curas e tecnicas pro s'analisi
"pre-impianto", e devent suffrire e detzidere a pustis de istrumare si su
fizu risultat malaidu? Est una cosa contra a sa vida, non pro sa vida e contra
sa salude de sas fèminas e de sas criaduras puru.
Totu cussos chi fizzos nde ant, diant a devere pessare ite aiant pessadu
o fattu si no fint naschidos mai.
E cun custu meledu, bos naro de andare a votare a sos referendum de lampadas
e a votare SI?!
Sa cussentzia deve essere libera e s'Istadu làicu.
