03/05/2005 Novas nòdidas

Meraviza: s'istadu italianu nos devet 4 miliardos de euros!

de Daniela Sanna

Pare chi sa Sardigna, e giai fit ora, pro tzertas cosas, s’est ischidende. Sa chida passada difatis, su Presidente Renatu Soru e s’Assessore a sa Programmatzione Frantziscu Pigliaru, ant fattu una cunferentzia pro s'imprenta pro faghere connoschere a sos sardos cantu ‘inare dae su 1991 a su 2003 sa Sardigna no at incasciadu dae s’Istadu pro intradas de Irpef e Iva . Emmo, propriu gai, ‘inare chi a sa Sardigna ispetaiat e chi s’Istadu no at giradu a sas cascias comente fit dirittu nostru. S’isbagliu pius mannu l'amus apidu pro unu ordine de die de su Senadu de su 1995, chi istabiliat una cuota variabile de s’Iva a segunda de sa pertzentuale de inflatzione de onzi annu , custu aisettende un’acordiu nou pro unu tassu fissu de s’iva. Pro annos e annos s’est andados a innanti gai, e cun tassos pius bascios puru de cussu de s’inflatzione chi nos naraiant. Nisciunu s’est abistu de custu isbagliu mannu. Pro su servitziu de sas intradas sa Rezone no aiat nemmancu unu dirigente o unu direttore generale e s’est sighidu a isbagliare pro bindighi annos. Su resultadu est chi sas cascias de sa Rezone pianghent e sos debitos sunt creschidos. A parte s’Iva chi aimus devidu incasciare pro 170 miliones de euros a s’annu (sugundu sos contos de Pigliaru), s’Irpef puru no fit girada dae s’Istadu a sa Rezone pro sa percentuale chi deviat essere. 

E tandu invece de su 70% de sas intradas produias in Sardigna, sa Rezone nde incassaiat su 40% ebbìa, chi in dinare diat essere 400 miliones de euro a s’annu.

Eppuru s’istatudu sardu est giaru: sa Sardigna devet incassare dae s’istadu pro s’Irpef sos sette decimos, pro ateras tassas minores sos noe decimos e pro s’iva una quota variabile chi però dae su 1995 est istada frimmada, comente giai nadu.



Pro como, narat Soru, “amus apidu un’incontru cun su Ragionieri de s’Istadu Vittorio Grilli, chi est parfidu ispantadu meda mirende sos contos fattos dae Pigliaru” e su Presidente at annantu chi pro su 2004 e 2005 si diat cherrere chi sas intradas siant aggiornadas, mentras pro sos annos passados s’at a fare dimanda de restitutzione e s’at a ‘idere ite at a sutzedere. 



Su ’inare chi mancat in sas cascias Rezonales est meda, pius o mancu 4 miliardos de euro. 



Isperamus chi s’Istadu nos los torret pruite gai, fortzis, sos taglios de sos annos bennidore ant a essere pius minores.



Forsis sa devolutzione at a essere s'occasione de aere pius indipendentzia fintzas in sos dirittos nostros? 



Daniela Sanna

A segus