Limba de Mesania: sa chi podet unire de prus sos Sardos
Su “Baròmetro” de su Diariulimba (sa cumproa-sundagiu de su giassu nostru) at bogau a pigiu su resurtau chi, forsis, podiat pàrrere iscontau. Ma est sèmpere unu sinnale de tènnere in cussideru. Pro sos chi ant partecipau sa proposta de “Limba de Mesania” est sa chi podet unire de prus sos sardos. Prus de sa bi-variedade campidanesa-logudoresa e prus de sa Limba Sarda Unificada, chi sighit a èssere pagu istimada e amada dae sos sardos. Ma b’at puru unu muntone de zente chi pensat chi bi siat bisonzu de un’àtera proposta de variedade “illustre” paris cun cussos chi pensant chi una koiné non b’at a èssere mai. Nadu totu custu accò sos resurtaos.
Ant partecipau in totu 307 votadores chi abitant su giassu nostru. De custos pretzisamente 185 ant respostu “Limba de Mesania” a sa pregunta de cale proposta podiat unire de prus sos sardos. Sa percentuale est de su 60 pro chentu de su totale. Ant respostu chi sa solutzione a su problema est sa bi-variedade logudoresa-campidanesa 64 persones (su 21 pro chentu). Sa Limba Sarda Unificada at incungiau 27 votos ebbia (su 9%). Si sunt ischieraos in 12 (4%) pro una koinè totu noa e in 19 (su 6%) pro nessuna de custas possibbilidades.
Ammentamus chi unu IP podet votare una bia solu ca si nono su programma lu blocat. Duncas, su consultu non podet èssere influentzadu dae sos organisadores. Su baròmetro servit a nois etotu pro cumprèndere si chie nos sighit recepit sas positziones nostras. Mi paret chi su chi cumbinat est ca, nessi chie sighit diariulimba, at cumpresu sa bonidade de sa proposta Limba de Mesania.
At a èssere gasi finas po totu sa Sardigna? Forsis no, ma solu proite mancant sas informatziones pretzisas.
