Su Sotziu Limba Sarda -Sezione Ballu Sardu- bos cumbidat a leare parte a su Cursu de Ballu Sardu pro totus sos amantiosos chi cherene aprendere e sighire su chi sa tradissione nostra nos at tramandadu dae mizas de annos.
Nois fundadores amus pessadu a unu prozetu chi cheret lomper a aunire traballadores, istudentes, intendidores e parentes cun s'intentu comunu de sighire un'adala de connoschentzia, imparu e de sanu allenamentu in custsu bellu eranu.
Unu ziu iscrieit:
Sagras e festas de Santos
Sonos de Carrasegare
sos passos dillana maigantos
E sas piattas prontas a festare
Bunneddas berritas e mantos
Si moven a passu cant'e pare
In dillos arroxada e durdurinu
cun sonos de launedda e tamburinu.
A custa ottava chi ammentat sa Sardinna de deris e pro fortuna de oje, nois de su Sotziu cherimus chi mamentos de ballu in armonia bi nde apat tantos e, massimamente in sas zitades ue sa zente, dae onzi parte de s'Isula, s'agatat pro traballu o istudios, e disizat un'aboju de SARDOS.
Nois comente neit calecunu semus pro:
In tempos de modernidade
Chi dan cara a sa globalizzassione
Chie tenet sentidos de amistade
Narat chi no a s'omologassione
Onzunu cun sa sua diversidade
Rispetet s'anzena tradissione
In limbas ballos e costumenes
In religiones colores e lumenes.
Cun cust'imprenta nos amus a ligare in una tropa de mannos e minores pighende in cussideru sos ballos pius connotos, partende dae Campidanu pro che arrivare a sa Caddura, o si cherides dae sa Caddura a Campidanu.
Su Cursu si abbojat in sa piatza de sa creja de Sant'Eulalia in Casteddu
e sa durada, pro incominzu, est de noe letziones.
Mese de lampadas joja 2 dae sas 9 a sas 10 : 30 de sero
Joja 9 ======================
= = 16 ======================
= = 23 ======================
= = 30 ======================
mese de triulas joja 7 sempere dae sas 9 a sas 10: 30 de sero
= = 14 ========================
= = 21 ========================
= = 28 ========================
Si capiteret chi bona parte de sos ballarianos tenen intopos pro sa joja o pro s'orariu, nde podimus chistionare totus umpare sa prima die signalada de presentazione de su Cursu.
S'intentu est cussu de fagher a connoscher :
Sa zenia de su ballu
sos passos
su ritimu
sa cadentzia
su cumpostesa
su grabu.
Sos ballos chi tenimus in bidea sunu:
Scottis
Logudoresa
Danza de sa Costera
Passu torrau
Dillu
Curre curre
Ballu zopu otzanesu
Ballu lestru
Pass'e trese
Danza marmillesa
Ballu aristanesu
Passu a trese campidanesu
Totus acumpanzados dae musicas a launeddas, cantos a tenores e sonos a sonette e organittu.
Sos ballos zitados no cheren essere pro nudda ne in ordine de importantzia ne de zassos ma, pigadelos comente un'assazu lichitu chi nos permitat mancari de nos agatare a ballariare in Aglientu comente in Macumere in Meana comente in Quartu Sant'Eléna ca su ballu est una manera in mesu e tantas chi acurtziat, faghet a connoscher e ponet sas mentes in armonia.
Su Sotziu Limba Sarda bos saludat e ringratziat e bos ispetat in paritzos.
