S’est mortu su poeta casteddaju Aquilino Cannas, fortzis s’ùrtimu grandu poeta casteddaju in lìngua sarda, mancai calincunu cumenti a Gianni Maxia ndi siat ancora sighendi su caminu, po bona sorti nostra. Fiat su cantori de Casteddu e de sa Sardìnnia intrea, poeta istimau in totu s’Ìsula nostra, bincidori de prèmius importantis e diretori de S’Ischiglia. In custas ocasionis est sempri mellus a chistionai pagu e a dd’arregordai cun una poesia sua. Gràtzias Aquilino po totu su chi as fatu po sa lìngua e sa cultura sarda.
A BALLU CANTAU
Pigada de s’arregorta “Mascaras casteddaias”, Aipsa edizioni
Ma it’est custu grandu atropeliu,
custu stragazzu mannu ‘e genti?
Ma di aundi nd’est stuppau,
di aundi nd’est calau custu antigoriu?
custu trumbullu apretau,
custu appetigu maccu,
de ominis e de feras?
Calaus indi sunt de su cungiau
de Santu Francau, di aundi ddus hiant
tancaus comenti in d’unu accorru.
Sfranchius hant camminau a s’acua
intre is gruttas, intre is domus de janas,
intre is gragatus. E ndi sunt benius a innoi,
in fundu a sa rocca: a m’agatai.
No sunt forastius castellanus
nì tarrazzanus de Nuraxi ‘e Susu,
sunt de is alas, de is appendizius.
Totu genti ‘e domu, de bixinau,
genti de campu in forza,
genti de cumbattimentu
armaus de leppa giustu in petturras.
E mi castiant. Mi castiant a fisciu
sene fueddai nimancu in suspu...
Ma, alloddu su de is launeddas,
alloddu chi de suncuna pigat a sonai
e s’insonada de s’andimironai!...
E chi maiemai dd’essit fattu! a ballu tundu,
a duru a duru, in totunu sciampittat
intera sa conduma!...e faint s’anchita
e su passu torrau, pistant is peis...
E de repenti arretronat su rocchili
che brunzu de campana ‘e populu.
Aproillai genti! Aproillai e castiai
custa grandu festa chi in nisciuna prazza
heis a biri mai! Aproillai e ballai,
aproillai e no tengais timoria
ca est totu genti ‘e brunzu, de valentia
chi sonat e cantat a cuncordu,
a ottavas, a muttettus, a repentina...
E giogant a morra, a strumpas,
a trivas de pari aintru de custu monti
immoi fattu a casiddu...Intrai
de sa Grutta ‘e su Stiddiu, benei
de sa Grutta de Santa Restituta...
I a luxi ‘e bandonis, calaus indi sunt
aici a pei, a traccas, a cuaddu, portendisì avattu
