18/05/2004Sa retzeta de sos economistas fentomados
Sardos: sighide a emigrare
S’àtera die in televisione ant fatu un’intrevista a un’economista nàschidu in Sardigna a subra de sas cunditziones de s’ìsula. Prus e prus s’arrejonu s’est frimmau in sa possibilidade o nono de sos giovanos de imbènnere triballu. Custu sabiu famadu at nau una cosa chi faghiat ritzare sa tudda. . In pagas paraulas sos giovanos laureados o nono devent leare su pagliete e emigrare. Su giornalista non l’at nau nè chi nono nè chi emmo, e sa cosa s’est sessada gasi. Ma, e sa dimanda tiddit a sa sola, l’ischit custu economista fentomadu chi sos sardos ant connotu e connoschent su disterru prus de cale si siat pòpulu? Cumbenit a gastare dinare pro sa formatzione in iscolas e universidade pro imbiare zente a aterue a ispesas nostras? Inue est sa novidade cando si cumbidat sa zente a si chircare triballu foras de Sardigna? Ma s’òbera de importu bera no diat èssere in finis a chircare triballu a sos sardos in Sardigna? Chimbichentos miza sardos sunt mòvidos dae inoghe fattende unu dannu sena issorvida po s’economia, sa cultura e s’identidade nostra. Su corpu mannu l’at retziu finas sa limba dae custu fatu. E in giambu, ite amus balanzadu? Cumerciantes, funtzionarios e economistas de sàmbene furisteri chi sunt nàschidos in domo nostra ma de sos nostros non ant galu imparadu a èssere.
