|
19/05/2004 In tres simpres fatos de campagna eletorale Elezioni regionali 2004:quale politica linguistica per la Sardegna? Mala tempora currunt po sa limba sarda. No semus nois ideàticos ma si paret chi sa chistione siat sèmpere prus fea. Tres simpres fatos de sa campagna eletorale po sa Regione nos si cumbinchent sèmpere de prus de sa timoria nostra. In primis, s’arrejonada ispetziale chi at fatu s’àteru sero Paulu Pillonca, unu de sos mannos de sos autores in limba, in sa trasmissione folcloristica de s’emitente televisiva Sardegna Uno. S’autore de “Chent’annos” at propostu un’apellu e un’amonestu chi, fatu de issu ca est òmine sabiu e mai imbolat paraulas graes po de baddas, faghet pensare a beru. “Si faeddat meda de identitade in custa campagna eletorale – at nadu Pillonca – ma paret chi custu pòpulu sardu de su cale totus faeddant siat mudu>. Comente nàrrere chi sos candidados a sos incarrigos mannos de sa Regione chircant de istraviare s’argumentu de sa limba ca est difitzile, o puru no li dant su cussideru chi meresset. Gasi at fatu unu candidau a sa presidentzia de sa Regione s’àtera die, in d’unu aboju mannu aparitzadu in oros de Casteddu. L’ant fatu preguntas de cada casta, fintzas de sa limba. At respostu a totas sas dimandas, ma a cussa de sa limba nono. Proite? Un’àteru candidadu a sa presidentzia de Villa Devoto, chi nachi est indipendentista, in d’una trasmissione eletorale de Videolina, gasi at respostu a chie li dimandaiat proite faeddaiat in italianu. |