mamma,
pro itte non as faveddau in sardu chin mecus?
ca mancu unu l'at faveddau chin tecus.
una borta fis pitzinna juchende unu scialle,
zente nabat a tibe che su sardu est male.
mamma,
pro itte ses andada in un'atteru locu?
ca non amabas sa terra'e ferru e focu.
una borta fis zovane, piccande unu core
e unu tedescu deppiat esser cust'amore.
mamma,
pro itte s'italianu est limba mea?
ca pessabas che cudda sarda eret fea?
commo, che ses unu pacu prus matura
za lu bies che tenzo una conca dura.
mamma,
pro itte no bies che sardu l' istimu?
ca no pothet esser fruttu de su sinu?
commo, as a esser betza carchi annu
e eo te regalo unu sardu mannu mannu.
