Aghite servit custa limba? Est sa pregunta “utilitaristica”chi bortas meda s’intendet cando si chistionat de sardu. Aghite si zai che b’at s’italianu? Non diat a esser menzus s’inglesu chi mi servit de prus? E su sardu, a parte cussu importu mannu de identidade servit de abberu? Preguntas periculosas cussas chi chistionant de “Utilitarismo” e chi essint dae buca de zente chi non s’accatat de sa richesa de sas diversidades e s’ismentigat chi sa Natura e sa Vida andant a innantis grassias a custas. E gai una die si cumprendet chi una cosa muforida chi pariat cosa de fuliare ca non serviat a nudda si faghet a medighina mutida Penicillina. E gai una limba e una cultura che a cussa de sos Indianos de America belle cantzellada dae cussa Dominante e cunsiderada “inutile” totu in d-unu pigat unu balore mannu.
Goi at nau Charles Chibitty, s’urtimu de sos Comanche « code talker »
“Chistiona in Codice”, mortu in custas dies:
- Cando andavo a iscola nos fut proibidu de chistionare sa limba nostra e, brullas de sa sorte, in su 1941 intames s’America nos aviat preghiadu imbenucrada de la impleare in sas operatziones militares.-
Tedescos e Zaponeses non furint resessios mai a comprendere ite
diavolu naravant cussos Comanches e Navajos, dande unu dispiaghere mannu a Hitler e un’azudu a un’America chi los aviat privados de sa limba e cultura issoro.
Grassias a cussu “Codice” chi po seculos sos Americanos aviant chircadu de cantzellare sunt resessios intamas a ponner pede in Normandia e a binchere sa
gherra, bortande a s’imbresse cussu cuntzetu de Utilitarismo chi medas, galu como, tenent a coro.
Chibitty in su 1989 paris cun sos ateros “code talker” at retziu dae sa Frantzia su titulu de Caballeris meressios e in su 1999 dae su Pentagono su premiu “Knowlton” po meritos in s’esertzitu. Su chi ant fatu cussos Comanche e Navajos po un’America nemiga chi gherravat cun ateros nemigos est contadu in sa pelicula de John Woo “Windtalkers”.
