Intendei me ita cunsideru est tenta sa literadura sarda oindì e cumenti sa
disorganisadura de tzertus obradoris dda fait sunfriri lassendidda a mraxi
de atrus spetàculus ki fortzis creint siant prus apretziaus de sa genti
(segundu mei sballiendi).
> Sàbudu 16, cumenti s'ia jai antetzipau, seu andau a Bolòtana po sa
premiadura de su Cuncursu Literàriu de Poesia sarda "Ortachis" e de Prosa
sarda "Amsicora" (organisau de su cumunu) anca ant sinnialau (cun "menzione
d'onore") unu contu miu (su tìtulu est "Ca dd'iat scritu su fadu") apustis
de is tres premiaus.
> Sa tzerimònia de sa cunsìnnia de is prèmius nci dd'ant stikida in mesu de
sa segundu dì de su Festival Internazionale del Folklore. S'assessori 'e su
cumunu Italu Bussa (ki creu fessit su presidenti 'e sa juria), m'iat
telefonau su lunis prima nendimì ca fia cumbidau a sa tzerimònia ki at essi
stètia "a is noi oras - noi oras e mesu - dexi" (testuali) aintru 'e su
festival. Deu seu arribau (fendimì prus de 150 km) a is noi oras e
bintixincu e no nci fut nemus, sa pratza fut sbuida! Su festival est
inghitzau a is dexi e trintaxincu, su presentadori no at arramonau po nudda
sa premiadura, duncas is premiaus no funt stètius cumbidaus a cuntatai
cancunu in sa pratza. Deu ca seu bregunjosu seu abarrau a una parti a mi
biri su festival abetendi s'ora.
> A is ùndixi e trintaxincu (apustis de is tamburinus de sa Sartìllia, su
grupu Villanova de Casteddu e unu grupu japonesu ki at fatu duas dantzas ki
no acabànt prus e sa genti ndi fut craramenti arròscia!) s'assessori Bussa
est artziau a su palcu e, sèmpiri
strumbulau a fai in pressi de is organisadoris de su festival, ken'e mancu
nai kini fiant is cumponentis de sa juria, at tzerriau is premiaus (fiaus in
totu otu, cancunu beniu de Casteddu e de Tèmpiu) e in binti minutus (a
mesunotis fut spaçau totu!) s'at cunsinniau is pergamenas, ligendi diabressi
is nòminis nostus (ken'e nai ni su logu ni sa bariedadi de sa lìngua) e is
"motivatzionis" de sa juria e fadendi ligi is obras sceti a Piras, Garrucciu
e Chiappori (is tres premiaus de sa poesia) (a primu iat nau a is tres
premiaus de sa prosa - mi nd'arragodu de Tirotto e Calvisi sceti - de ligi
dexi (!) arrigas de su contu insoru, ma poi no si dd'ant permìtiu ca fut jai
tradu!).
> Apustis ndi seus calaus de su palcu, s'ant cumbidau una tassa 'e birra
strantaxus a su bangu, e a mesunotis e dexi mi ndi seu andau. A sa una e
coranta fia in domu, prexau ke puxi!
> Lassendi is brullas, deu fia cuntentu diaveras, ma s'assiguru ca is facis
e is oghiadas de is premiaus no fiant prexadas meda, issus si connosciant
totus e si bidiat ca fiant avesus a atru cunsideru in atras ocasionis.
Açungei ca in s'Unioni no ant imprentau nudda, duncas is bincidoris funt
abarraus is solus a ddu sciri!
> Lassu a osatrus is cumentus po unu cunsideru sìmbili de sa curtura nosta.
Nau sceti ca po mei tzerimònias diaici s'iant a depi fai in logus prus
trancuìllus, cun cussu programa sceti e cun su tempus de podi presentai
mellus sa juria, is autoris e de podi ligi is obras bincidoras ananti 'e unu
pùbrigu interessau e cumpetenti.
>
>
> Saludi e literadura sarda
>
> Stèvini Cherchi
>
