07/07/2004 Sa prima essida de s'assessora Pilia a pitzu de sa limba

"Limba? Est de importu, ma paris cun àteras cosas"

de Lìberu Massaju

Elisabetta Pilia, dirigente bibliotecàriu de s’universidade de Tàtari, est assessora regionale a s’Imparu Pùblicu. S’at a dèpere ocupare de polìtica limbistica. Dd’at nominada Renato Soru paris a sos àteros ùndighi assessores de sa Giunta chi s’est presentada s’àtera die cun sa pandela de sa novidade e de su rinnovamentu. Sa dottoressa Pilia est una de is ses fèminas chi su presidente nou at fatu bessire a èssere titulares de incarrigos de guvernu po giare unu sinnale de muda forte in sa polìtica sarda. Intervistada de Sardegna Uno est parta segura e detzisa a fàghere meda. At nadu ca non timet totu is cumpetentzias chi at a dèpere cumbàtere in s’assessorau e ca sa prus importante est cussa de s’Istrutzione poite, comente at nadu paricias bias Soru in campagna eletorale, sa connoschentzia at a sarvare sos sardos. Su giornalista de Sardegna Uno Cabasino dd’at fatu a pustis una pregonta ispecìfica: S’assessora at respostu innantis cun d’unu meledu pessonale nando ca in familia sua iant foeddau in italianu poite su babbu fut de Casteddu e sa mama de Berchidda, marcando una dificurtade bera o presumia. In fatu at nadu ca <..seguramente sa chistione de sa limba est de importu, ma no est s’ùnica chi nos connotat comente sardos. Nde ddu at àteras medas puru foras de cussa de sa limba...>. Custa sa prima essida in argumentu de limba de s’assessora “tennica” in custa legisladura noa. Po sa legisladura betza marcaus ca s’assessore Falchi iat ghettau su bandu in logos medas anca iat aere fatu una lege noa po sa limba in bàttoro meses. Custa nuntza fut parta atrivia e ideàtica. Di fatis sa lege non s’est bida e fortzis est mengius gasi. Verba volant, limba manent.

A segus