|
14/07/2004 Su cunvenniu in s’Univessidade de Casteddu Cun sa LdM torrat sa democratzia de Lìberu Massaju S’est foeddau de « Limba de Mesania » s’àtera die in sa facultade de Lìteras de s’Univessidade de Casteddu. In d’unu bellu e cracu atòbiu fatu in d’unu merie de istade. Nd’est bessia a pigiu custa realidade noa chi giughet innantis su “Comitau abbia a unu sardu comunu”, sotziu de sotzios, de sìngulos, de intelletuales, de limbistas, de òmines e fèminas de voluntade bona. Po non si pèrdere in chistiones tocat a nàrrere ca sa proposta, po ddu nàrrere a sa sarda, "no est mala". Praghet, agradadat, piaghet, praxit. Prus e prus su disinnu polìticu e su mètudu democraticu de cunfrontu. De torrare a biere in capas est calchi piessignu tennicu de sa grafia, de su paradimma verbale, de su fraigu pronominale e cosas gasi. Ma ddue est sa seguria de sighire in sa tenta, in s’àndala de s’istùdiu de custos limbagios lacanargios po nde pòdere isboligare una chistione allomborada comente cussa pesada dae sa proposta de Limba Sarda Unificada. Ma si sa LSU fut fatia (artifitziale), calada de s’artu, totalizante e non poniat in contu perunu is campidanesos, sa LdM est naturale, movet dae unu comitau de base, non pretendet de ocupare sos logos de is variedades naturales, e aunit ambas duas sas macro-variedades. Dae sos interventos nd’est bessiu a foras unu sentidu de amighentzia, de rispetu, de democratzia. Totu a s’imbesse de cussu chi si biet e s’intendet in àteros logos in ube s’aparitzant cungressos e cunvennios « truccaos », sena mai fàghere intendère is boghes chi non funt de acordiu cun su « dogma » de sa LSU. De da dibata democràtica de Casteddu nd’at bessiu a foras propostas operativas e bideas bonas. At abertu Peppe Corongiu, e at sighiu Giuliu Paulis, preside de sa facultade mere de domo, chi at giau su saludu. Micheli Pinna at decrarau chi "custa est una proposta de dialogu non de cuntierra". Ninu Pala, de su partidu de Renato Soru Progetto Sardegna, battendo su saludu de Nicoletta Ornano, at citau unu pessu de Giuanni Lilliu chi at nau a is polìticos in s’Unione Sarda chi "sena limba no ddue at identidade". Paula Alcioni, Micheli Ladu, Frantziscu Cherazu ant punnau a totu is chistiones tennicas de sa proposta, mentres Anna Cristina Serra, poeta campidanesa at postu in craru ca "custu comitau a su mancu tzerriat sa gente po intendère sos parres de totus". Antoni Carai, Giuanni Maxia e Efis Sciola ant giau unu bellu contributu a sas arrexones de su “Comitau”. Mauritziu Virdis e Mariu Puddu ant serrau su merie de istùdiu cun paraulas de sabidoria e ispera. S’apuntamentu a àteros atòbios in chentu biddas. Bonu triballu a su “Comitau abbia a unu sardu comunu” . Lìberu Massaju |