|
21/07/2004 Amus retziu custa lìtera e la publicamus Galanos isteddos in Galanolandia De Istefano Astore Apo lettu s’articulu chi chistionavat de Galanoli. Curiosu numene Galanolandia. Adattu mescamente pro una Terra uve totu est grassiosu, totu andat bene, totu est normalizadu. Donat seguresa, serenidade, discansu. In ive su bisu shakesperianu de una notte de mes’estiu cunsentit a sas pessones de si ponnere su coro in paghe, ca su chi paret tragedia, su chi paret andande male benit bortadu in commedia agiustandesi in nd’unu nudda, belle pro maghìa. Bellu, antzis, Galanu. S’ispera de chie at aparitzadu s’atoviu paret cussa de cuvare su chi andat male in sa chistione de sa limba, ca non si chircat una dibata, unu "cara a cara", un'istiza de cunfrontu. Pro gai si podiat aparitzare mengius un’incontru in su tretu de sa Solitudine in Nugoro, gasi, isula in s’isula, fortilesa in sa fortilesa, solu pro si chistionare a s'ispriccu. Una notte de mes'estiu uve su chelu est craru, limpiu, chene luna e sos isteddos funt lughentes.Propiu comente s'ULS, s'ufitziu de sa limba sarda, chi at aparitzadu s'atoviu de Galanoli, pessat de fagher sol’issa politica limbistica e chi tenet a diciu "In sa galassia de sas limbas onzi paraula est un'isteddu". Ma b'ant isteddos e isteddos. Caligunu mannu, caligunu ruviu, caligun'ateru in cumpanzia. Nde b'at finas una zenia chi non si cumprendet si funt mannos o piticos. Ma b'at trastes in su chelu chi sutzant totu su chi b'at afurriu. Lumenados "buchi neri", istampos nigheddos, pariat chi non lassavant issire nudda a foras de sa lacana issoro, sa lacana "chene torrada" de Schwarzchild, linea chi non si podet biere e nemancu colare, lacana de unu inghiriu de connoschentzias solitas e veridades riveladas. Pariat chi manc'una notissia depiat issire a foras de cussu ingurtorgiu chene fundu. Ma sas cosas no funt goi e finas su chi at pessadu custa teoria est torradu a segus. A Dublino su Prof. Stphen Hawking bellagai at a narrere chi custos molinetes cosmicos non suspint propiu totu totu e chi carchi informatzione che fuit dae issos. E leghende custu Diariu mi paret chi siat gasi finas pro sa Limba Sarda. |