|
19/07/2004 Dae su 5 a s'8 de austu in sa 'idda de su Goceanu BONO: SA FESTA DE SA LITERADURA SARDA de Micheli Pinna Custu aboju chi su Comune de Bono, chin su contributu de sa Regione Sarda, assessoradu de sa cultura e de sa pubblica istrutzione at ammanizadu, naschit dae s'idea chi sa literadura e sa produtzione culturale tota devet torrare a bistare in mesu sa zente. Sa poesia, su teatru, sas contansias, su cantu a boghe nuda o acumpanzadu dae sa musica, de cada zenia, prima de onzi cosa sun vida. Prima chi esisteret s'iscritura sos testos si cumponian pro esser isibidos in mesu sa zente, pro calecune o pro carchi cosa, pro pregare a Deus o pro decrarare amore a una femina. In gosu o in tristura, pro narrer veridade o pro brullare. Su cuntatu tra sa zente, tra chie ascurtaiat e chie cantaiat, resaiat una poesia o contaiat unu contu, l'istabilian sa boghe, su movimentu de sas manos, s'impostu de sa carena, sos sinnales de sos chizos. Dae cussu, comente narat su poete bonesu Antoninu Mura Ena, "Onzi umana peraula, nada a omine biu, e ascultada in risu e in piantu, tando solu incomintzat a vivere. E est de pensamentu eternu bolu". PROGRAMMA ZOJA 5 DE AUSTU a sas 10 de manzanu In s'aposentu de su cossizu comunale su saludu de su sindigu a sos iscritores, a sos poetes, a sos resadores e a su pubricu presente. - Cumbidu - Bustu A sas 5 de borta de die presentatzione de su liberu de E.GIORDANO "A s'iscusia" (poesias), Ed. Delfino. A sas 7 de borta de die In s'aposentu de su cossizu comunale chistionada subra sa limba sarda cun FRANTZISCU CHERATZU, MARIO PUDDU, MASSIMO PITTAU. A sas 10 pustighena Sos poetes resan in sa piatza A curtzu a sa carrela de sa posta betza - Premiatzione CHENABURA 6 DE AUSTU A sas 10 de manzanu, aboju a Comune de sos coros, de sos cantadores e de sos tenores a fagher sas proas e a medire sos tempos pro s'ispetaculu de su sero. - Bustu A sas 7 de borta de die In s'aposentu de su cossizu comunale presentada de su liberu de FRANTZISCU IRDE "Bonela" Ed. Unicopli, 2004. A sas 10 pustighena In piatza: cantadores a chiterra, tenores, coros e poetes - Premiatzione SAPADU 7 DE AUSTU A sas 10 de manzanu Aboju in su comune de sas cumpanzias teatrales pro sas proas e pro medire sos tempos de s'ispetaculu de su sero. - Bustu A sas 7 de borta de die Presentada de su liberu de COSTANTINA FRAU E PEDRU PUDDU: "Mandigos e usantzias in Sardinna" Cuec e de COSTANTINA FRAU "Su Guilcieri" Ed. Condaghes. A sas 10 pustighena In piatza bi sun sas cumpanzias teatrales DOMINIGA 8 DE AUSTU A sas 10 de manzanu In s'aposentu de su cossizu comunale an a esser dados riconnoschimentos a personalidades de sa cultura e de sa sotziedade chi an onoradu sa Sardinna: B.BANDINU iscritore, F.C.CASULA istoricu, F.CHERATZU editore, G.COLUMBU rezista, S.FENU zenerale de sos carabineris, M.PITTAU limbista, T.M.RUBATTU poete, D.TURCHI iscritora. B'at a esser su sindigu e ateras autoridades politicas militares e relizosas. - Cumbidu - Bustu A sas 7 de borta de die presentada de sos liberos: NANNI FALCONI "Su cuadorzu", PAOLA ALCIONI E ANTONI MARIA PALA "Addia", Ed. Condaghes. A sas 10 pustighena In piatza bi sun sas cumpanzias teatrales - Premiatzione In sas piatzas de Bono bi deet aer mustras de sas produtziones locales e furisteras e mustra de sos liberos sardos contivizada dae AES (Associazione Editori Sardi) paris a su sotziu de sos libraios sardos indipendetes. Si benides a Bono pro sa festa de sa literadura sarda azis a poder zirare su logu, azis a poder assazare su binu, su manigu e sa durcaria chi bi faghen. Si sezis amantiosos de sa natura azis a poder andare, a pagos chilometros dae Bono, a Monte Pisanu, a Foresta Burgos, a Foresta Anela, a Sa Fraigada a Iscuvudè, a Badde Salighes, e si nono, azis a poder andare a sos Bagnos de Benetutti a bos allisiare sa pedde, o a Nule a bider sos tapetos nodidos e famados, o a su Burgu a bidere su casteddu de Adelasia. Pro manigare b'at tres osterias e una paia de agriturismos a presios baratos chin manigos sanos e saborios. Si cherides drommire, su matessi. B'at logu in Bono o in sas biddas a lacana, in albergo o in domos brivadas. Pro bos catzare su sidi b'at funtanas de aba frisca ispartas peri sa 'idda e unos bindighi o seighi tzilleris. A onzi bonu contu, si azis bisonzu de informatziones e de notissias siat pro manigare, siat pro drommire o pro bos dare indicos subra sa bidda e subra sa zona, sas dies de su festival in piatza de su Comune acurtziadebos a sa barraca de s'organizatzione e sos operadores bos an a dare, in su chi poden, su chi bos bisonzat. Micheli Pinna |