<Sardoa Grammata> : sa “revolutzione” de sa limba iscrita de sos nuraghesos
de Peppe Corongiu
No isco si su lìbbru de Luisi Sanna “Sardoa grammata” (domo editora S’Alvure, paginas 589, euros 80) amustrat in contos de isientzia sa beridade provada. Naro, po èssere onestu e làdinu, chi m’iat a pràghere meda. Non seo peroe a s’artària de pòdere nàrrere una paraula congrusiva. Iat a toccare a èssere sapios de contos antigos meda, de datos isientificos de cuddos tempos, e non m’intendo de intrare in custu. Apretzio però su triballu de Sanna e cumprendo ca, si esset istau beru chi sos mannos nostros nuraghesos connoschiant sa limba iscrita, totu s’istòria, antzis totu sa “percezione” de s’istòria de is sardos iat a dèpere mudare. Duncas, fatzo is in oras bonas a Sanna, e a totu is sardos, chi custu libbru siat apretziau, letu, averiguau e cunfrimmau in sas seas prus pretzisas.
Paris cun su lìbbru de Sèrighe Frau “Le colonne d’Ercole”, bessiu giai duos annos e mesu a como, custa òbera de su professore aristanesu de gregu e latinu iat a dèpere tocare a manu bona su cherbeddu (o su coro) de is sardos impignaos in sa cultura, e non ebbia. Custa ida noa de comente sunt andadas is cosas in cussos tempos iat a dèpere èssere su frammentu po pesare tempos noos e prus capassos po s’identidade e sa cultura sarda.
No iat a èssere pagu, o foras de sentidu, po sa capia ispantosa de custu libbru a foeddare de “rivolutzione”. Poite, si sas tesis de Sanna s’ant a iscobèrrere beras (e ddas iat giai pubblicadas calencunu annu a como ma oe cun prus istùdiu) medas testos de iscola s’ant a dèpere torrare a iscrìere. E custa bia prus in favore a sa Sardigna e sa tzivilidade prus manna chi at prodotu: cussa de sos nuraghes. Podeus nàrrere ca dae sa Preistòria si colat a s’Istòria.
E in custos ùrtimos annos, po fadu bonu e eretu, passos a in antis in custa andanta si nde sunt fatos medas: nuraghes iscavaos in Israele; arrastu de sos Sardos antigos agataos in Egitu; navios nuraghesos in sas tumbas etruscas e s’ipòtesi de Frau de sa Sardigna nuraghesa comente ìsola “Atlantikà” birde, arrica e felitze comente un’Atlantide diciosa. Fintzas si a calincunu, comente e sempere, custu “revisionismu” istòricu no dd’est pràchiu. Nè agradessiu meda, prus e prus, est a sos intelletuales “fenicios” de domo nostra, chi non cherent a fàere tropu manna s’istòria nostra proite si nono s’impiticant issos.
Ma ite narat Sanna in 500 paginas e prus? Cussu chi medas de nois pentzaiant dae meda. In pagos foeddos ca cussa tzivilidade chi iat fabbricau nuraghes, tumbas de gigantes, bronzetos e istatuas no est beru ca non connoschiat s’iscritura. Non est possibile. Antzis, is testimonias de sos sinnos iscritos de custa limba sunt medas, ma fintzas a como no ddos iant pigaos in su giustu cunsideru.
Poite? Poite ca si fut ormai afortiada s’idea in sos istùdios ufitziales ca cussa erentzia fut “barbàrica” contras a sas genias “superiores” classicas fenicias, gregas e latinas. E duncas, fintzas istigas de iscritura non podiant mai èssere agatadas: e si agatadas, no ddas ant connotas, e ddas ant istransias. Po comodidade, po non tènnere istrobbos, e fintzas po ideologia.
Paret custu su chi est cumbinau a sos bàttoro siddos de brunzu agatados calencunu annu a como in su nuraghe Tzricotu de Cabras (e àteros repertos) chi, a parre de s’autore, giughent sinnos craros (tramudabbiles e tramudaos in su libbru) de sa limba e de is arfabetos nuraghesos. Custas modas de iscriere, segunde s’autore, lompent a Sardigna dae sas cussorgias siro-palestinesas paris cun sa gente “Srdn” (in iscritura consonantica de cussos tempos), is famaos “Shardana” chi posca iant a èssere sos nuraghesos matessi.
Custos mannos nostros de s’Antigoriu resessent a imperare totu sos arfabetos (prus unu totu insoro) chi in cussos tempos furint “a sa moda” in su mediterraneu: paleosinnaiticu, cananeu, gublita e feniciu. Antzis, sa famada istele “fenicia” de Nora (chi nemos est galu resessiu a tramudare si non a orrugos) in realidade no est iscrita in sa limba de Tiro o de Sidone, ma in limba shardana cun carateres fenicios!!!
Luisi Sanna, sighendo cun fortilesa s’idea de fundamentu de su triballu suo, nde proponet unu tramudu totu intreu, gasi comente traduet sos sigillos e àteras iscritziones presentes in perdas de nuraghes, in bronzos o in àteros logos. Nde bessint a campu arrastos de una Sardigna nuraghesa “SRDN” gasi comente sa logica dd’iat a bòlere chi essat. Gente manna e forte e de cultura rappresentante de una tzivilidade manna chi fortzis solu su “tsunami” pentzau de Sèrighe Frau, o unu calisisiat degollu de sa sorte, at derutu e redusiu a un’erentzia barbàrica e resistentziale comente cussa istudiada de Lilliu e chi prus e prus, fintzas a como s’est connota.
E tando su disigiu e su cumbidu nostru est a comporare custu libbru e a ddu lègere cun sa curiosidade e s’impignu chi minescet. E a ddu ispainare. Est a provare (cun gosu!!!) su sentidu de si nche pèrdere in mesu a custu mundu SRDN e in presentzia a su Deus (Unicu e Assolutu) de sos nuraghesos chi si mutit “Yahwh”, agimai comente cussu de sa Bibbia. O puru est “Ag”, su trau forte. O fintzas “Ab” su pigione celeste. O “Sa’An” o “A–Bay”, Babbay Santu, o Babbu Mannu, o Sardus Pater comente dd’iant tzerriau sos romanos. Sos rees de sos nuraghesos, mentovaos in sos brunzitos, sunt “Gghly”, “giganlo-y”, “gigantes”, curiosamente comente sas tumbas, comente “Y-ana” est sa dea mama chi posca sos fenicios ant mutiu “Tanit”. E fintzas is is sinnos de àteras istatuas-isteles, comente is perdas fitas de Làconi, no iant a èssere pinturas de figuras umanas, de òmines furriaos a giosso o de bardias de gorteddos a duas puntas, ma sos primos passos de s’iscritura.
A parre de Sanna sos “tria nomina” non furint latinos ebbia, ma fintzas nuraghesos. Gasi comente sa limba de custos Srnd non fut gasi istesiada a largu dae su latinu ma fut de sa matessi raighina, in presentzia de unu substratu anatòlicu de sas gentes eneoliticas chi sos Shardana matessi iant sutamitiu. Custa tzivilidade auniat totu sa Sardigna: in s’istele de Nora Yahwh est naradu Babbai Santu de Nora, de Trss (Tharros) e de Grr (Corra, Cornus), duncas est sìmbulu de s’unidade natzionale de su populu sardu. S’eredidade de custa gente sighit a durare fintzas a tempos prus longos: si podet dare chi Amsicora no esset unu printzipale sardu-feniciu, ma unu Babbai de sos Srnd galu in podere. Po Sanna est curiosu chi sos giganlo-y siant cualificados in sos siddos comente “rees-giuighes”, tìtulu chi in s’edade de mesu, sos giudicados indipendentes torrant a bogare a campu...
Realidade istòrica, bisos, tropu amore po sa cultura e sa patria nostra? A congruos, faet a nàrrere chi una rivolutzione podet èssere fata fintzas sena irgannare e bochire. Su triballu “revisionista” est cumintzau como pag’ora. In capas non totu su chi iscriet Sanna podet èssere leau a cussideru comente beridade santa. Antzis, est a òbrigu po sos archeologos e glotologos de professione a averiguare su chi si narat cun tropu seguresa. Ma no iat a èssere pretzisu ne a dd’istransire, ne a non de fàere contu perunu. Comente non iat a èssere meda a bistu, de parte de s’autore, a si nche la leare contra archeologos e istudiosos chi ant amustrau sèmpere su balore insoro, e fortzis non an tentu sa fortuna, su tempus o sa capassidade de abaidare inue e comente at abaidau issu a cussos sinnos.
No est comente narant Brecht e sos intelletuales fenicios de domo nostra: sa Sardigna tenet a bisongiu mannu de eroes. Cuddos de sos tempos de “Ag ab Sa’an Yahwv”, ma fintzas cuddos de sos tempos nostros. S’ispera est duncas cussa de biere custu lìbbru averigau, passau a su microscopiu e collaudau in totu sas sea sientificas chi ddi deghent. Sena brigas. Po ischire si est beru, comente paret lògicu, chi s’Istoria in Sardigna cumintzat cun nois, e non cun sos àteros. No est cosa de pagu contu. Est sa chistione de cumprèndere si sa vida nostra, comente pòpulu, est istada de “resistentzia”, o si seus istaos capassos de nos garantire una “esistentzia” positiva e produtiva.
