Paolo Zedda e Antonio Pani funt duus cantadoris e operadoris culturalis connotus e istimaus in totu sa Sardìnnia. Sinniesu su primu est presidenti de su sòtziu culturali “Su bentu estu” chi at prodùsiu is CD de su tenore San Gavino de Oniferi e de su sonadori de launeddas Andrea Pisu de Biddeputzi. E at aprontau diversas rassìnnias de mùsica ètnica, cursus de poesia e su festival internatzionali de cantu improvisau “Musas e Terras”. At girau totu s’Europa po rapresentai su connotu poèticu isolanu impari a s’amigu suu e collega Antonio Pani cuartesu, prus de 1000 garas fatas!, issu puru docenti de cantu improvisau, assessori nou a sa cultura in Cuartu etotu e in cumbata, cun su sòtziu culturali suu “Boxis campidanesas”, po fai acostiai is giòvunus a su mundu de sa cantada. Pani est finas autori de parìcias incisionis, siat traditzionalis siat de “world music” tra s’antigu e su modernu, penseus tanti po ndi nai unu, a su progetu “Bàsciu e contra” cun su grupu “Àrgia”.
Duus autoris prus che titolaus duncas po custu bellu progetu de sa “Alfa Editrice” e de sa Provìncia de Casteddu. E chi ponit unu “tzàpulu” a una farta manna, sa mancàntzia de literadura specializada po s’improvisatzioni poètica sarda. Sceti in custus annus difatis funt cumpartus is primus iscritus ispecialìsticus, bisòngiat a arregordai is àutus de su cumbènniu de “Musas e Terras 2004” ma finas is publicatzionis, de Ignazio Macchiarella, Paolo Bravi, Marco Lutzu, Michele Mossa tra is ùrtimus e de certas revistas chi funt donendi su giustu spàtziu a custas chistionis, cumenti a “Làcanas”, “Nae” o “Sa Republica Sarda”. Is televisionis regionalis arrispundint ancora tropu fridas ma ndi balit sa pena de arregordai su “special” in duas puntadas de TCS “Imprentas de indentidade” de Ottavio Nieddu totu dedicau a sa poesia improvisada e a su festival sinniesu cun òspitis is duus autoris de su libru e Paolo Bravi. Incapas calincuna cosa est cambiendi, a bellu a bellu.
Su lìburu est pensau po is iscolas e si presèntat duncas in unu formau chi potzat praxi a is giòvunus, cun una bella gràfica, coloriu e arricu de fotografias, no tropu longu e complicau ma chentza de rinuntziai mai a su rigori e a su precisioni de su chi si nàrat.
Paolo Zedda introdusit sa stòria de su cantu de sei, improvisau, in Sardìnnia, spriculitendi a fini totu sa bibliografia, de is clàssicus fintzas a is grandus viagiadoris chi ant contau, spantaus, de is poetas sardus. Incuadrau de unu puntu de vista stòricu su fenòmenu e arribendi a chistionai de su connotu cosa nostra, in su specìficu dd’eus a nai, si ddui arrexònat de is acumpangiamentus printzipalis, launeddas, coru guturali, ghitarra etc, e si proponit po sa primu borta, si no mi faddu, una pratzidura de su connotu sardu in cuatru traditzionis printzipalis: mutetu longu, otada, mutos e repentina. De donniuna de custas si fait una stòria e un’anàlisi de sa mètrica e de sociologia de sa cantada, fueddendi de is costumàntzias e de is cantadoris prus mannus. Aprofondia sa parti dedicada a su mutetu campidanesu, presentau cumenti a sa forma sarda autòctona prus cumplessa, ddui est una cantada cumpreta puru in is ùrtimas pàginis de su libru, s’otada logudoresa invecis est de importatzioni toscana, nàrat s’autori. Si sèrrat cun unu glossarieddu e sa bibliografia.
Fait ispantu su biri sa variedadi e s’arrichesa de is mòdulus traditzionalis sardus ma fait a timi puru su si nd’acatai chi assumancu duas de custas traditzionis, mutos e repentina, funt giai giai sparessendi. In is àteras natzionis de Europa, mass mèdia e interventus polìticus cuntzedint su logu chi ddis merescit a custas manifestatzionis, in is Paisus Bascus is campionaus natzionalis de is “bertsolaris”, cantadoris, ddus faint in is istàdius, prenus, e funt trasmìtius de sa televisioni de innia, ddui funt scolas e publicatzionis in cantidadi e su tempus benidori de su cantu improvisau est assigurau. In logu nostru, mancai calincuna cosa si siat movendi cumenti eus nau, is mass mèdia trascùrant ancora custa manera de fai arti, sa scola e sa polìtica a su pròpiu e totu, cumenti a sèmpiri in custas chistionis parit lassau a sa bona volontadi de is apassionaus, cumenti a Paolo Zedda e a Antonio Pani apuntu.
