Sigundu unu bonu ditzionariu sardu: totu su chi est de fuliare... una de sas ervas chi creschent in mare.
In Sardigna tenimus su narrer chi si un’omine no balet a nudda, est “arga ‘e muntonarzu”. Lu namus finas, a banda de su tenner pagu balore, mascamente cando cherimus fagher a cumprender chi faghet dannu ca est in sa natura sua a brutare su logu. At a esser beru finas pro unu poulu intreu?
S’arga a su muntonarzu. Muntonarzu e arga formant su matessi giassu. Sun ligados dae sa matessi sorte. E tando, pro esser argas de muntonarzu cumpridos nos bisonzat su muntonarzu. Ca sa Sardigna comente est como est tropu atesu dae cussa cunditzione.
Fortzis chie nos cheret imbiare su bellu presente de una muntagna tosconosa, pessat chi no semus galu cuncordos. E tando cheret ponner s’urtima ria de preda in su nuraghe de sa fusione perfetta chi, che a onzi cumprimentu istoricu renchenit tempus meda.
Pro fagher bardana bene fata bi cheret calicunu de su logu chi diat sos inditos e azuet sas rebulas malas in su seberu ‘e su posidu e in sas andalas de atraessare.
In sos seculos, nois ateros, cando nos tocat s’impreu de su contivizu pubricu, amus imparadu a esser semper bonos basistas pro chi, chie tenet cosa bona de furare o pagu cumbeniosa de che frundire- finas faghendebi lucuru – no apat de si matanare meda e agatet s’aidu abertu.
In tempos de democratzia cumprida e de sardismos mustrencos, sos aministradores nostros ant sighidu cust’acatu. Fertos dae unu raiu de abistesa autonomista: sa leze – naschida in fatu a s’unda de rebeldia chi at atraessadu s’isula, carchi annu faghet, contra a sa mineta de nos imbiare revudos radiuativos - chi brivaiat de manizare e ammuntonare s’arga furistera, l’ant currezida e trampada.
Como si potet carrare cussa rudda mala. Gratzias a un’articulu nou, de sa leze n.8/2001, bastante chi sos velenos istranzos siant impreados comente materias de partentzia in s’industria sarda. Si mutint materie prime intames de scorie. Pagu importu tenet, si pro onzi giunta de materiale balanzadu, inoghe arreat una muntagna de toscu ponzende in arriscu sa salude e sa bellesa de Sardigna.
Sa richesa remonida in sos millennios e cussa benidora, solovrada pro un’incunza dudosa e faltza de pagos francos.
Andare a votare chi emmo, ponzende unu SI in s’ischeda cheret narrer a currezer una farta. A truncare s’abitu a una terachia chi nos torrat in segus,intames de nos ghiare in su benidore de cuncordia cun sa natura.
O cherimus fagher che a cuss’ŕliga – posidonia oceanica – chi si est muiada a biver in mare pro no morrer in terra?
Damu cara, ca s’arga chi nos isetat in su giannile no est metafora!
