Capitat bortas meda de atoviare Ossimoros. Custa allega chi cheret narrere “Acuta ottusità” tenet zai in intro de issa una cuntraddissione o a su mancu sempere duas peraulas chi sunt s’una su cuntrariu de s’atera. Su bonu de sas bortas peroe abarrat solu unu zogu de allegas ca in sa realidade non diat a essere possibile agatare una “Concavità convessa”, custu poite sa pessone chi osservat sas cosas podet tennere solu unu puntu de mirada e duncas o est s’una o est s’atera, o est concava o est convessa.
S’ omine abarrat unu pagu istontonau ainnantis de cosas gosi, ca podet fintzas essere esistidu unu “Ebreu nazista” ma a sas oricras de chie l’intendet l’at a parrer unu frastimmu.
Ma!
B’est sempere unu ma. E s’omine tenet su donu mannu de colare sas dificultades de custas cuntraddissiones mannas in maneras difenentes : a bortas ismentigandesinde, ateras galu afutindesinde. Ma sa bona parte de sas bortas s’omine agatat una medighina meraculosa chi si podet mutire “cerchiobottismo” o “chircuguppismu” chi mudat un’Ossimoro in Assioma, chi mudat una cuntradissione in nd’una base simple e elementare po unu sistema lozicu frommale, chi faghet de s’eccetzione sa regula.
Est capitau duncas chi unu (Angioni) chi at semper nadu chi sa limba sarda non serbit ca zai b’at in Sardinna sa limba italiana, siat istadu postu in sa cummissione po sa Limba Sarda, andat bene!?, ma non cuntentu de esser un’Ossimoro est sighinde a iscriere in sos zornales cosas chi andant contras a sa limba e in carchi manera fortzis fintzas contras de chie l’at mutidu in cummissione. Soru duncas at creadu un’Ossimoro chi s’est faghende abbellu abbellu Assioma, regula base de chie podet tennere a coro sa Limba Nostra e fintzas ego, in custu mulinete de cuntraddissiones, de anomalias e de ossimoros, mi so cumbintu chi po defendere sa Limba Sarda bastet una cosa sola:
"Viva la lingua italiana, la nostra lingua non serve a niente!"
Solo così, con queste belle e chiare parole in italiano, la lingua sarda potrà considerarsi salva.
