|
18/06/2005 Parres lìberos Sa revorta de Mialinu de Peppe Corongiu Como pagu tempus sa Regione at criadu unu "giannile" in sa Retza chi tratat sos problemas de s'imparu pùbricu. S'inditu est www.conoscere.it e est intregau a su nòmene de Mialinu Pira (o Michelangelo Pira segunde s'anagrafe italiana), iscrianu bitichesu, chi deghinas de annos a como iat a calencuna manera profetizau s'imbentu de Internet. Làstima ca s'autore de "Sos sinnos" fut unu amparadore mannu de sa limba sarda, e cheriat su bilinguismu de fatu e de deretu, proite in custu giassu de limbazu sardu non si nde agatat mancu una paràula. A nàrrere sa beridade, ddue est una setzione "lingua e cultura sarda" ma est totu in italianu. Su sardu est unu "simple" ogetu de istùdiu e non sogetu de atzione comunicativa. Pira iat iscritu fintzas unu lìbru chi fut retulau " Sa revorta de s'ogetu " e s'ogetu in argumentu fut su pòpulu sardu chi, istracu de èssere cussiderau unu traste medidau e prammizau dae is istrangios, si nche revortaiat pro foeddare in prima persone de sei. E cun sa limba sua. Ma in www.conoscere.it "Sa revorta de s'ogetu" est comente chi non s'esset mai iscritu. O de seguru sos responsabiles non dd'ant lègidu. Su chi tzucat a sa mente est si, po cumbinatzione in Sardinnia, no ddue siat a die de oe unu progetu po incheremire e istudare s'identidade de su pòpulu sardu istrumentalizende sos "eroes" e sos argumentos natzionalitarios. E de atrudire sa potentzialidade de sa limba sena dda cuntrastare a craru, ma bochendodedda cun unu paru de cura omeopàtica. Comente chi siat una maladia virale cun milli efetos collaterales chi guastat su regime culturale de is grefas chi guvernant oe s'ìsula. Ti naro ca tenes arresone, ca sa limba bolet difendia, ma non ti lasso bessire a craru su foeddu. Ti naro ca ei, ma ti tupo sa buca. Foeddo de cultura sarda, ma cuo sa limba. Fatzo calencuna cosa po sa limba, ma dda fatzo cun chie faet dannu. Sa gente capassa, ca est perigulosa, dda pongio a banda. Dedico totu a Pira, ma mi nd'afuto de su chi narat. Si s'agataiat galu, Mialinu 'e Crapinu, si fut revortau de aberu. |