Custu contu at bintu su primu prèmiu in su cuncursu literàriu “Su Fermentu” de Sìnnia, lòmpiu a sa ‘e XI editzionis. M’est doveri a pretzisai chi est isceti un’incrutzadura de unu contu prus mannu chi at tocau a adatai po ddui podi capi in is lìmitis de longària prevìdius de su Prèmiu. Chi teneis cumentus de fai mi podeis iscriri a: is4morus@hotmail.com.
Bona ligidura.
Ivo Murgia
Apusti pràngiu dd’iant circau po una coja chi depiat fai, si ndi fiat istrantaxau de cussa cadira iscòmoda, arrimendi su lìbburu chi portàt in manus.
Iant arrexonau prus de un’ora, Don Marigosu no fiat malu cumenti a predi, sceti a bortas pariat isganiu. Atras bortas ddi praxiat a frandigai prus de su tanti is devotus suus.
Pustis iat torrau a pigai in manus cuddu lìbburu e ndi iat lìgiu unu bellu tanti, fintzas a sa funtzioni de mericeddu.
A s’essida dd’iat firmau Rosina e dd’iat nau: “Don Marigosu mi depu cunfessai, seu arruta in tentatzioni. Su Mincidissu no mi làssat sa conca in assèliu.
Coixedda s’est torrau a presentai e una borta de prus m’est cumpartu in sa personi de fustei Don Marigosu, spollincu po essi spollincu. Infogau pariat, e deu...no nci apu pòtziu fai nudda. Gei no apu a abruxai in s’inferru chi nci arrutzu torra in sa tentatzioni?”.
A cambiai bidda no est cosa fàcili, ma a bortas serbit puru. Antzis a Don Marigosu, a nai sa beridadi, giai giai ddi faiat prexeri. Pesau in citadi, s’idea de si ndi andai a bivi in bidda, gei parit ca dd’aggradessiat. E difatis no si ddui fiat agatau mali. Sa bidda fiat ingiriada de su monti, su logu fiat bellu, sa genti bona, a dda sciri pigai, po s’atru no nci iat nudda de si depi chesciai. Is devotus fiant curiosus. Rosina si boliat cunfessai giai dònnia dì, unu pagheddu tontatza gei ddu fiat. No fiat abarrada mancu meda a s’apassionai a su stràngiu nou, chi fessit su predi pagu ddi cambiàt, fiat istràngiu e custu abastàt. A Don Marigosu ddi andàt a gèniu, po cantu fessit curiosedda, no ddi fiat iscarèsciu mai ca fiat istètia sa primu a ddu carculai in bidda, e po unu stràngiu no est pagu.
“Ita làstima!” Nci ddi fiat bessiu candu dd’iat biu po sa primu borta e iat iscìpiu ca fiat su predi nou, “Unu bellu piciocu”. Don Marigosu si fiat fatu totu arrùbiu.
“Seu sigura ca est druci che meli” iat aciuntu puru. Don Marigosu si ndi fiat sapiu luegus ca fiat sa tonta de bidda. In dònnia bidda prus o mancu nci nd’est unu. E in is citadis puru; prus de unu.
Sa crèsia fiat prena prena. Sa novidadi iat fatu acudi sa genti che musca a su meli. Ma sa funtzioni fiat una funtzioni etotu, s’ùnica novidadi fiat issu. Ddi fiat partu de biri prus de un’ogu sprapaddau conca a issu, totu spriculendiddu beni beni. In una bidda anca no ddui sutzediat nudda, dònnia sonu pariat tronu. Acabbada sa missa, Rosina si ndi fiat pesada e iat aboxinau: “E imoi tzacarreus is manus a su predi nou!” e iat incumentzau issa etotu a itzacarrai, ma nemus dd’iat posta infatu. Sa mamma de Rosina fiat totu afrigia e iat nau ca fiat sa disdiciada de bidda, pròpiu aici iat nau: sa disdiciada.
Don Marigosu iat fatu ca ei cun sa conca e nci fiat bessiu.
Is fueddus de cussa picioca ddi fiant zumiaus in conca a totu dì, finas in su sonnu. Dda biiat arriendi e nendi: “Ita bellu chi est Don Marigosu”. Si ndi fiat pesau pensendi a cantu est tontu s’òmini.
In crèsia iat pigau a ammancai cosa. Una dì a Don Marigosu ddi fiat ammancau su prapallissu e issu no isciiat a cali manu si donai. Po cantu dd’essit circau no dd’iat pòtziu agatai in perunu logu, ma no iat tentu su stògumu de ndi fueddai cun nisciunus. E nci fiat passada.
Po s’atru is dis suas sighiant asseliadas, in bidda.
Sa stòria de su prapallissu fatu fatu ddi torràt a muinai in conca e po ispàssiu si poniat a pensai a is cosas prus macocas. “Mi ndi dd’at furau Rosina po ddu tenni in domu asuta de su letu, acanta sua”. E nci ddi scapàt s’arrisu. “O calincunu pòburu apretau?” ma custu no ddu faiat arriri. “Candu mai a furai in crèsia! Po cantu siat pòburu apicigau a terra unu, in crèsia no ddui fùrat!” pensàt.
A sa funtzioni de mengianu iat provau a castiai is borrochianus, a unus a unus, mancai de atesu. “A arrisu de bosatrus seu?”. “A su predi foresu nci ddu faeus abarrai mali custa borta” fortzis calincunu iat pensau, po malesa, send’èssiri Don Marigosu de tropu pagu tempus in bidda po istrobbai a calincunu, chini si bollat chi siat.
“Don Marigosu, Don Marigosu apu scìpiu, mi dispraxit” iat nau Rosina. “Seus brava genti nosu, custas cosas no ddas faeus, at a essi stètiu calincunu de foras”.
Don Marigosu timiat de si depi stentai cun sa picioca disdiciada, cumenti ddi naràt sa mamma.
“Abetit pagu pagu, mi depu cunfessai: seu arruta torra in sa tentatzioni. Lutziferru s’est torrau a presentai in forma de coloru, m’at totu trobeddada e mi nd’at liau is bestiris, agoa a palas de una nui manna manna de fumu nd’est bessiu fustei Don Marigosu...”.
Custa cosa de sa fura in crèsia perou no nci dda podiat calai. Po su prapallissu pagu mali, ma in crèsia a bolli fai a malus, cosa de furai gei ndi ddui iat, calincuna pintura antiga, stàtuas, oreria, prendas de prata e aici sighendi. No est chi imoi donniunu nci podiat imbucai a crèsia a ndi pigai totu su chi boliat cumenti e chi fessit cosa sua, e nou!, custu no ddu podiat permiti. Iat detzìdiu de cumpudai beni sa chistioni e spriculitai tra is devotus e no sceti. Ora lìbbera gei ndi teniat bastanti, in calincuna manera boliat passada e s’idea de su detective sèmpiri dd’iat tenta aggradèssia. A bortas ddi pariat de essi aintru de unu telefilm: “Su detective Don Marigosu” o “Is aventuras de unu predi in una bidda”. Su segundu tìtulu fiat tropu longu po unu telefilm e no boliat nai nudda.
Cumenti si bollat chi siat, cussu merì nci fiat bessiu a monti, no po spriculitai ma pròpiu po si fai una passillada o po pensai puru. Is fragus de su monti fiant finas tropu forti po unu piciocu pesau in citadi, is prumonis no ddus aguantànt. E un’atra cosa puru: timiat a sirboni. A nai sa beridadi no dd’iat biu mai ma ddu timiat etotu, bai circa e poita. Sa televisioni no podiat essi ca si ndi biiant pagu, is lìbburus nimancu, su babbu no fiat cassadori ma s’ajaja ndi iat tentu unu in domu sua, imbartzamau. Cussu fortzis.
Candu su soli nci fiat intrau dd’iat cassau in padenti e totinduna si fiat biu ingiriau de su scuriu. “Don Marigosu!” dd’iant tzerriau de parti de palas. A Don Marigosu agiumai ndi ddi calàt calincuna guta. “E chini est sa genti?” iat nau. Rosina fiat. No iat acurtu a ddi nai ita dimòniu nci faiat ingunis a cuss’ora chi issa iat aciuntu: “Circhendi ambulatza”. “In logu bellu ti ponis a circai ambulatza, sa giustìtzia...”. Po sorti manna dd’iat solu pensau ca no est cosa beni fata po unu predi a nai cosa diaici. In s’interis chi furriànt a bidda impari pensàt: “Is cosas de Rosina”. Ma no iat nau nudda.
Un’atru personàgiu de bidda fiat s’osteri. S’ostaria fiat pagu cosa, ses aposentus ebbia, ma po su turismu chi ddui iat nci ndi iat de avantzu puru. S’osteri cumenti in totu is biddas, prus o mancu, fiat su gazetinu: unu grandu pidanciuloni. Gazetu ddi narànt e cumenti eus nau no fiat po de badas. Is ses aposentus de su primu pianu fiant sempri beni tentus ca no ddui crocàt nemus. In bàsciu ddui iat una sala manna e unas cantu mesas, calincunu scannu de cuddus artus, e sa ziminera; custa incapas fiat sa mellus pensada chi Gazetu iat tentu in totu sa vida sua. Prus de una borta in dì de festa, cussa ziminera fiat serbia po pichetai.
Duus fitianus de su tzilleri fiant Coudu e Umu. A Coudu ddi narànt aici no po ca portessit coa, ma po su steddu coudu, ca fiat unu grandu apassionau de astrologia; a Umu ddi narànt aici ca fiat unu grandu apassionau de geologia. Po issu meda de is chistionis de s’umanidadi si podiant arrangiai gràtzias a su humus, chi fiat, sèmpiri po issu, sa retzeta po dònnia mali. Segundu Coudu intamus de circai su humus tocàt a castiai prus a susu, a celu, sceti innia si podiant agatai is arrespustas a totu is pregontas. Duas filosofias fortis, po una bidda aici pitica. A Gazetu ddi pariant perrerias foras de sentidu e candu biiat ca incumintzànt cun is arrexonamentus insoru si alluiat s’arràdiu.
Is atrus de bidda intrànt e bessiant, chentza de si ddui stentai prus de su tanti.
Cussu mengianu in su tzilleri ddui fiant: Gazetu, Coudu e Umu, sa crica sòlita.
Iant pigau un’arrexonu curiosu, nou, anca in citadi iat pigau tretu sa moda de internet e anca fiant sutzedendi cosas de ispantu. Anca de celu, iat nau Coudu, ndi fiat calada una pregonta, sa pregonta antzis, e nisciunus nimancu is concas mannas de citadi, nci fiat arrennèscius a agatai s’arrespusta. Umu iat nau ca issu puru dd’iat intèndiu, ma ca a issu si dd’iant contada diaici: de asuta de terra ndi fiat artziada sa pròpiu pregonta e nisciunus nimancu is concas mannas de citadi, nci arrennesciant a ndi cumprendi calincuna cosa. Po Umu tòcat a torrai a sa terra, a su humus po essi precisus, po ndi podi bogai pei de cussa chistioni. Coudu no fiat de acòrdiu, candu mai a sa terra, a celu tocàt a castiai. Gazetu iat abasciau su volùmini de s’arràdiu sa borta, e iat parau origa.
Pustis de nd’ai arrexonau giai totu su merì e de essi abarraus donniunu in su suu, iant detzìdiu chi calincunu de bidda si depiat comporai unu computer, no certu issus ca no si ddu podiant permiti ma calincun’atru giai. Gazetu iat torrau a artziai su volùmini e fiat torrau a is fainas suas timendi a bortas no essint circau a issu; “E no m’acomputeris!” iat pensau.
Don Marigosu in su tzilleri no ddui abbitàt meda, ma is cosas, prus o mancu, ddas isciiat a su pròpiu. Bai circa.
Is devotus suus sa dì no fiant atentus meda a sa missa. Candu ddus iat dèpius comunigai si ddus fiat torraus a mirai beni, a unus a unus. “Ma a ita ant a essi pensendi” si naràt Don Marigosu, si ndi fiat sapiu issu puru ca sa conca insoru fiat currullendi in atrus sartus. “Custa stòria de su prapallissu dda intendint cumenti a una bregùngia manna, scurixeddus”.
Su prus de is borrochianus iant scìpiu de su contu de su computer e de sa pregonta de internet e no si ndi fiant pràndius, ndi boliant ancora. Ma tocàt a comporai unu computer, calincunu si depiat sacrificai po su beni de totus. Nisciunus sa dì si fiat cunfessau e medas si fiant stentaus in pratza a arrexonai. A innantis de totu tocàt a isciri, assumancu, e ita fiat cussa pregonta e agoa iant a essi biu su de fai. No, no, nci boliat unu computer luegus. Ma e chini ddu depiat fai su sacrifìciu? Genti chi si proponessit de spontu suu no nd’iat. S’ùnicu chi podiat fai s’ancada fiat su tzillerarxu: Gazetu, chi perou no ndi boliat mancu s’intèndida; sceti candu dd’iant nau chi totus iant a essi fatu sa parti insoru pariat cumbincendisì.
Don Marigosu sa borta, fiat istètiu s’ùrtimu a isciri de sa chistioni noa de bidda. Ndi dd’iat fueddau Rosina, in cunfessioni, impari a àterus pecaus cumìtius de issa etotu.
Calisisiat sa pregonta, s’arrispusta est in sa fidi, iat a essi dèpiu nai de bonu predi, ma a bortas no nci creiat meda mancu issu. “S’arrespusta est in s’òmini etotu, in sa genti, cudda vera perou” pensàt sei sei.
Candu Gazetu pariat giai cumbintu si ndi fiat iscrètiu. Coudu e Umu intzandus iant detzìdiu de nci calai a citadi po circai de ndi cumprendi de prus. Iant pigau su postali de is seti e cuartu, a mengianu. Lòmpius a citadi apustis de essi fatu su giru de su molenti unas cantu bortas nci fiant imbucaus a un’internet cafè. Aici iant scìpiu: iant lìgiu de sa pregonta. Iant scrucullau totu beni beni a biri ita ndi narànt is de citadi de cussa chistioni. Cun su postali de is cuatru e cuartu fiant contoniaus a bidda chi fiat giai scurighendi. Sa sala de Gazetu fiat prena a istibbu, sa genti agiumai no ddui capiant. Totus boliant sciri de sa pregonta. A nai sa beridadi no fiat nimancu una pregonta, una sentèntzia pariat, ma boliat un’arrespusta. Iant contau su de contai. Calincunu ndi fiat abarrau delùdiu ma su prus ndi fiant abarraus abbabbalucaus, a nai pagu.
Don Marigosu ancora no ndi sciiat nudda. In s’interis chi acadessiant custas cosas, de crèsia fiat isparèssia una statuedda de linna de Santu Nàssiu de su milli e sescentus.
Cun macus e cun santus no fait a nci brullai; ddu scint totus. Su sdorrobatòriu de sa statuedda de Santu Nàssiu no fiat cosa de dda pigai a brulla difatis. Ni po Don Marigosu ma nimancu po is devotus e po sa bidda. Bella figura! “In cussa bidda fùrant finas in crèsia. Deus si ndi campit de genti aici!” iant a ai nau. Bella figura!
De sa trona anca fiat Don Marigosu fiat acanta de incumentzai a chistionai a is devotus suus. “Mancai siast sètziu in sa trona prus arta de su mundu ses sèmpiri sètziu asuba de su culu tuu” naràt su poeta. E Don Marigosu ddu sciiat beni e fiat de acòrdiu puru: “Bona po cuddus chi bòlant in “artus celus” pensàt. Calincuna cosa dda depiat nai perou. “Amigus, fradis, chi no seis cuntentus po calincuna cosa, chistionai!” iat nau. Nisciunus si fiat trèmiu. “Arratza de prèdica!” iat pensau luegus su predi. Tocàt a nci ddis passai a sa parti de s’ogu malu po ddus fai chistionai. Don Marigosu puru nci fiat arribbau e dd’iat serrada ingunis abetendi su momentu giustu po torrai a pigai s’arrexonu. A faci a pari.
Custa borta Lutziferru fiat unu crabu mascu sèmpiri abbramiu, ndi ddi calànt is salias e bogàt fumu de is càrigas, ma Don Marigosu no ndi teniat gana de iscurtai is bisus de Rosina. “Nara Rosina no est chi tui ndi scipiast calincuna cosa de su chi est acontessendi in bidda? Cun mei no chistiònant” si fiat arriscau a nai. Custa stòria dd’iat postu pensamentu e cun Rosina fiant in cunfiantza, cumenti si bollat chi siat.
“Nossi Don Marigosu. Santu Nàssiu dd’at a isciri, no deu”.
Su marisciallu Màriga fiat cresiàsticu meda. Mali no ddi faiat. “Don Marigosu innoi no ndi bogaus pei. Chi podiat fustei...spriculitai pagu pagu...is sangunaus nostrus s’assimbìllant puru...cunfessendi mancai...si fait eh...”. No fiat istètia un’essida de bonu cristianu cussa.
De sa stòria de internet e de sa pregonta nisciunus nd’iat torrau a chistionai.
“Beh giai chi no bolint chistionai cun mei pigu is paperis e mi ndi andu” iat pensau Don Marigosu. Unu momentu de disconsolu.
Sa dì si fiat presentada sa mamma de Rosina po si depi cunfessai. No si cunfessàt mai. “Filla mia est devota meda, su predi. Màssimu a Santu Nàssiu” iat nau. Issa a crèsia nci acumpangiàt a sa filla ma no pariat interessada meda, pariat ingunis isceti po dda billai.
Sa borta su marisciallu Màriga puru si fiat ghetau a sa spiritualidadi e si boliat cunfessai. “Don Marigosu istimau chi no s’agiùdat fustei innoi...est cosa de...ajò! mancu crei ddu bollu chi no apat intèndiu nudda...ita figura nci faeus...seus mesu parentis puru...”.
Don Marigosu nci fiat bessiu a su sartu a passillai cumenti aconstumàt a fai, po pensai mellus e po si nd’abarrai a solu. “Santu Nàssiu, Santu Nàssiu, sa Cumpangia de Gesus”. Nudda.
Candu fiat andau a si crocai iat provau a si ligi sa vida de su santu a bortas no dd’essit ispirau calincuna cosa. Nudda mancu cussu.
A s’incras nci depiat calai a citadi po chistionai a Munsennori. In su postali fiat a su pensa ca ti pensu: Santu Nàssiu, oficiali spanniolu fertu in Pamplona. Andendi ande Munsennori iat biu piciocalla bistius a camisonis birdis, cantendi e sonendi e iat pensau ca fiant Hare Krishna o una cosa aici. Is religionis indianas o de cuddas partis no dd’interessànt. Bai circa.
Su munsennori Matza fiat làngiu che canna e fueddàt cun una boxixedda chi pariat cantendi a tràgiu froriu. “M’ant nau, ita mi naras” boliat isciri.
“E ita ddi nau imoi” iat pensau Don Marigosu ma dd’iat isceti pensau. Iat circau de nai su pagu chi sciiat e de spricai su pagu chi ndi iat cumprèndiu. Giai nudda. “Sa giustìtzia no s’agiùdat” fiat acanta de ddi nai ma ndi ddi fiat partu làstima de su marisciallu.
Candu su munsennori si ndi fiat istrantaxau po ddu saludai, Don Marigosu dd’iat torrau a mirai: prus làngiu puru ddi pariat e is ogus bessendiddi. “Gesugristu miu, unu corru parit. Custu si tìrat bentu meda nci ddu bòlat a trevessu” iat pensau. “Custu no dùrat” iat pensau puru ma cumenti si ndi fiat sapiu de cussu pensamentu malu, luegus iat pediu perdonu. E si ndi fiat andau.
“Benapat s’andada!” arrexonàt sei sei in su postali. A ita fiat serbia?
Innantis de serrai cussa giorronada perou dd’ammancàt ancora una cosa de fai: a cunfessai: a Rosina. Un’entruxu lestru che su bentu ndi calàt de celu prontu a dd’afracai, candu de a palas de una mata de arroli ndi bessiat issu a spada in manus prontu a dda sarvai.
E fiat andau a si crocai duncas. Si iat bisau de essi un’àchili bolendi in is àiris isteddadas, ma calincunu de in bàsciu iat circau de ddu sparai. Bisu malu balla!
A dì infatu fiat de spètzia mala: ellus! bisus de fai fiant?
Su marisciallu Màriga fiat cumpartu a mengianeddu: “Gei no dd’at a ai nau nudda a munsennori” iat printzipiau a nai. A Don Marigosu ndi ddi pariat làstima de su marisciallu.
Umu e Coudu cumenti eus nau, giai chi sa cosa no iat pigau tretu in bidda, iant lassau su si interessai a sa stòria de internet e a sa pregonta e a is atrus machìminis de citadi. “Chi s’impichint cun computer e cun totu!” pensànt. Dd’iant arròsciu. Su contu de su sdorrobatòriu invècias fiat incumentzendi a nci ddus tirai. Bai circa.
Defatu iant incumentzau a scrucullai unu pagheddu, aici chena de malesa, e fintzas po nci passai s’ora. Totu e is duus trabballànt in su sartu, a contu insoru, cuddus terrinus chi teniant fiant a costau a pari, ingunis si fiant connotus in picinnia e de cussus nci campànt is famìllias insoru. E aici fiant.
Su logu mellus po scrucullai, mancu a ddu nai, fiat su magasinu de Gazetu. Gazetu perou ancora no si fiat apassionau a su contu de su sdorrobatòriu. Bai circa.
Dònnia àtera ocasioni perou fiat bona, po sa busca insoru.
S’idea fiat de passai anche Capitanu primu primu. Capitanu no iat connotu ni gherra e ni disterru, ma fiat unu malassortau aici etotu. Prus pagu de Rosina ma no pròpiu giustu giustu nareus. A bortas, in is biddas si nd’agàtat prus de unu de malassortau. Cosas chi tòcant a Deus funt, no a is òminis. Aici nant assumancu.
S’allomìngiu nasciat diaici: biviat in una barraca in s’essida de sa bidda, giai in su sartu podeus nai, chi fiat istètia sa barraca de is barracellus unu tempus. Issu in conca sua pensàt de essi su capitanu de is barracellus. No ddu fiat mai stètiu, si cumprendit. E s’allomìngiu ddi fiat abarrau apicigau a pitzus: cuntentu issu e cuntentus totus.
Capitanu fiat pascendi unu tallitu de crabas: de cussu si campàt. Cumenti iat biu genti arribbendi fiat giai pensendi a sa manera de nci ddus podi bogai prus in pressi. Capitanu timiat s’umbra sua etotu ma si boliat a solu; bai circa.
Iant chistionau de una cosa calisisiat e nci iant ghetau un’oghiada a fùrriu a fùrriu, a biri si agatànt calincuna cosa chi ddus podessit interessai. Cumenti a sèmpiri Capitanu no teniat gana de chistionai e iat segau su preguntai insoru narendi ca depiat billai su tallu e de tenni passièntzia.
E giai chi no iant agatau nudda si ndi fiant andaus ma iant detzìdiu de ddui torrai a iscusi, a biri ita fiat totu cussa pressi de nci ddus bogai.
Passaus chi nci fiant ses mesis de s’arribbu de Don Marigosu, po afestai cumenti si depit, iant pensau beni de fai sparessi de crèsia un’àtera statuedda de linna: Santa Arrita. Aici fiant in bidda.
A su marisciallu Màriga no nci ddi capiat in conca: un’àteru sdorrobatòriu! In una bidda aici pitichedda! Bella figura po issu e po sa cumpangia sua! Ma ita si ndi faiant de totu cussas istatueddas? No faiat nimancu a si ddas torrai a bendi ca fiant bessias in sa televisioni e ddas iant bias totus. Duas oras a pustis fiat arribbau su fax de su cumandu centrali: su marisciallu puru nci depiat calai a citadi. E de pressi puru.
Iat pigau una màchina de servìtziu po fai prus a lestru, ma in logu de nci ponni duas oras nci nd’iat postu giai tres e mesu. Dònnia mesora si depiat firmai, o po andai a su còmudu o po si bufai una cosa in calincunu barri. A pamporis fiat. Totu sudau sciustu cola cola. “Gei ant a essi prexaus in su cumandu! Custa borta mi nci bògant diaderus e a sonu de corru puru, bella figura!” pensàt. E no si fut isballiau de meda.
Is arrugas fiant prenas de piciocalla bistia de arrùbiu, cantendi e sonendi ca pariant in festa: “Ma nci nd’at de genti stròllica in citadi. Sonaus”.
Su cumandanti fiat arrinnegau forti. No po is istatueddas de linna no, ma pròpiu cun su marisciallu. Nci dd’iant mandau a cussa bidda po no fai àteru dannu, e po cumbinai calincuna cosa de bonu, chi nci arrennesciat. Aillargu de sa citadi e de is ogus suus. Ma no nci arrennesciat, a su chi parit. Su pagu chi su marisciallu iat nau, totu cumenti iat pòtziu fiat: “Eus a circai de fai su chi podeus po ddas agatai”. Po nai custus pagus fueddus nci fiant bòfius coranta minutus. Is fueddus iant dèpiu annadai in mesu de milli “Pedu perdonu su capitanu”, “Tenit arrexoni su capitanu” e “Est totu curpa mia su capitanu” e aici sighendi. Candu su capitanu nci dd’iat bogau, iat isperau in coru suu de no ddu torrai a biri mai prus.
Cumenti su marisciallu fiat bessendinci, iat sonau su telèfonu: unu de cuddus canis mannus de sa polìtica fiat. Dd’arrecumandàt de fai de totu po agatai cussas istatueddas, ca dd’iat telefonau su munsennori e issu dd’iat impromìtiu ca ddas iant a essi agatadas in pagu tempus, donendiddi su fueddu suu personali. De su prapallissu no si ndi incuràt. “Totu custu trumbullu po duas istatueddas bècias e papadas de su brèmini” iat serrau pensamentosu su capitanu. Su marisciallu iat acurtu a intendi cussus fueddus. “Gei andaus beni! Chi si nci ponit in mesu sa polìtica puru! Totu asuba mia!”.
Is òminis de sa cumpangia no si fiant impressionaus meda a su contu de su capitanu e de sa telefonada. Su marisciallu invècias no iat pòtziu tancai is ogus mancu unu momentu: tropus pensamentus malus. Santu Nàssiu e Santa Arrita fiant inchietus cun issu. Santa Arritixedda iat pèrdiu sa passièntzia puru sa borta.
A Don Marigosu ndi ddi pariat làstima de su marisciallu.
Sa bidda iat detzìdiu de nd’arrexonai totus impari: una spètzia de boddeu po cumprendi ita totu fiat sutzedendi. Cosa aici in bidda no nd’iant connotu mai, no nd’iat cagau baca, cumenti si nàrat. Una fura in crèsia! Su sìndigu iat dèpiu ponni infatu: sa bidda iat detzìdiu. Cambigrutzu ddi narànt e fiat tzopu. Ma no fut nàsciu aici, a piciocheddu piticu unu carru armau dd’iat prenciau. Ddui iat una basi militari stràngia in bidda, fatu fatu is istràngius, chi si ndi fiant postus meris de su logu, giogànt a sa gherra e unu pipiu nci dd’iat acabbada asuta de unu carru armau. Sa cosa dd’iat arrangiada cumenti iant bòfiu; a fortza de dinai. Su sìndigu iat pòtziu studiai e sa famìllia si fiant fatus una bella domu manna e si fiant comporaus unu bellu ortu in su sartu, mannu cussu puru. E issu sempri atzòpia atzòpia. Aici fiat andada sa cosa, cumenti si bollat chi siat.
Sa sala fiat prena e sa genti fiat a cracu, no nci ammancàt nisciunus, fintzas Capitanu ddui fiat andau e mi’ ca cussu fiat malu a movi.
Su sìndigu Cambigrutzu iat saludau a totus ma fiat passau in deretura a chistionai de s’acontèssiu chentza de si perdi in ciaciarras. “Faina de genti de foras est custa” fiant totus de acòrdiu a nai, “Cosa aici in bidda no nd’eus connotu mai” narànt puru. A su sìndigu ddi pariat ca sighendidda aici no iant a essi arribbaus a nudda de bonu. Don Marigosu puru dda pensàt diaici. E cosa chi no faiat mai, iat pediu su permissu de podi chistionai. Cudda mala figura in sa trona ancora no nci dd’iat calada. “La patologizzazione del nemico è un meccanismo di difesa” iat nau. Nisciunus si fiat cìnniu. A Don Marigosu ddi fiat intrau su frius. “De sa cantidadi ndi bessit sa calidadi” iat pensau su predi “Chi sigu a nai at a andai mellus”. “Si depeus agiudai de pari a pari” iat provau a nai duncas. Unu in fundu a sa sala nci iat ghetau unu sturrudu, un’atru si ndi fiat pesau e fiat andau a pisciai. Cussa pesada dd’iat postu sa tzudda a Don Marigosu. Iat torrau su micròfunu a su sìndigu e fiat andau a si setzi. Iat giurau de no torrai a fueddai in pùbblicu mai prus. Foras chi siat in crèsia, si cumprendit.
De totu cussa genti pinnigada a pari perou, no ndi fiat bessendi nudda de bonu diaderus, su sìndigu chi no fiat tontu si ndi fiat sapiu. No boliat serrai s’atòbiu de cussa manera. Iat mirau a su marisciallu Màriga e cuddu iat abasciau is ogus, “E ita bolit custu imoi” iat pensau sa giustìtzia. Cambigrutzu iat cumprèndiu.
De a foras fiat lòmpiu unu tzèrriu lègiu: “Currei currei Rosina nci est artziada a cobertura!” iat nau su chi si ndi fiat pesau po andai a pisciai. Totu si ndi fiant istrantaxaus de pressi e fiant curtus a foras. S’ùrtimu fiat istètiu su marisciallu, candu depiat acontessi custa cosa, issu fiat in s’aposentu de su còmudu: si iat isbutonau is cratzonis, no ddui capiat prus in cudda divisa, si fiat ingrassau tropu. “Gesugristu miu it’est totu custu carraxu?” iat nau e si fiat incarau in s’enna cun is cratzonis a mesu culu. Totus dd’iant castiau ma no dd’iant biu, ddui fiat Rosina in sa scena e fiant torraus ande issa. Fiat in sa cobertura diaderus, e fiat cosa de timi. No si scit mai. Totus a ogus a celu fiant, “Custa sceti mi nci ammancàt” iat nau su marisciallu cumenti fiat arribbau. “Torrai sa cosa a crèsia!” iat itzerriau sa scedada, sa disdiciada antzis, cumenti ddi naràt sa mamma “Ita ndi iat a essi de nosu! Scomunigaus!”. Totu sa bidda fiat asuta de su palàtziu comunali. A Don Marigosu ddi fut tocau a provai a nai calincuna cosa mancai essit giurau: “S’òmini prus connoscit is debbilesas suas e prus lìbberu est” iat nau ma no dd’iat cumbinta. Sa mamma si fiat dismajada. Su marisciallu no podiat parai in logu: “Gei sutzedit calincunu sciacu innoi e nci passu deu” pensàt. “A giogai cun santus...”.
Una funi fiat cumparta in su sintzu de sa picioca e dd’iat istrinta acapiendidda. Capitanu fiat e dd’iat insogada. Nci fiat artziau a cobertura de parti de palas, a iscusi de totus. A tipu craba dd’iat trobeddada, gei no fiat crabaxu po de badas, e nci dd’iat torrada a terra. Imoi ddui fiat issu in sa scena.
Sa picioca fiat muda, sa mamma fiat torrada in trassa, Capitanu fiat contoniau a barraca e totus si ndi fiant andaus a domu. Pensamentosus e mesu atzicaus puru si intendiant.
“E un’atra cosa est fata” iat nau su marisciallu.
Giai dexi annus nci fiant passaus de sa dispidida de Venutu, un’amigu de Don Marigosu. Giai dexi annus chi si ndi fut andau ma calincuna cosa de issu abarràt sèmpiri. In su coru de chini dd’iat connotu.
S’onorèvoli Trunfa fiat abetendi un’abbisita cussu merì. Unu cani mannu fiat Trunfa. Is duus òspitis iant spacau su segundu e iant atacau luegus a arrexonai de su chi ddis interessàt: is duas istatueddas. Cincuxentus milla francus nous si baliant, castiai a biri, e boliant sciri e chini iat fatu s’aconcada de ddas fai sparessi. Una bella faina chi podiat fai fastìdiu a calincunu o interessai a calincun’atru. Segundu.
Po mala sorti mancu Trunfa ndi sciiat meda, antzis s’abetàt de ndi sciri de prus de is duus òspitis ma sceti in su momentu iat cumprèndiu chi cussus ndi sciiant cantu e a issu: nudda.
Su pensamentu de totu e is tres fiat curtu a s’ùnica personi, foras chi siant issus etotu si cumprendit, chi podiat essi interessau a cussas òperas. Unu specialista, una spètzia assumancu: Schidoni. E iant detzìdiu de si torrai a biri s’incras, cun Schidoni puru.
Schidoni fiat portau a nòmini po impresas de cussu tipu ma si boliat pregau, iat tocau a ddi impromiti de nd’arrexonai papendi pisci, sa passioni cosa sua, càmbara prus de totu, a safatas prenas ndi papàt. E aici iat tocau a fai.
Candu a s’incras si fiant bius in domu de s’onorèvoli fiat giai ora de prandi, Schidoni fiat arribbau famiu. Nimancu iat saludau su meri de domu e iat punnau in deretura a sa mesa: ddui iat càmbara chi pariant in festa de coja. Si fiat sètziu e iat inghitzau a papai, “Sterrei sa chistioni” iat nau e in s’interis chi si satzàt, Trunfa e is atrus duus dd’iant contau su contu de is istatueddas isparèssias de una cresiedda de bidda. Cosa de no crei, fiant arrimadas ingunis bai circa de candu e imoi chi iant scobertu ca si baliant cincuxentus milla francus nous fiant sparèssias!
Candu Schidoni nci iat papau sa càmbara e bufau su binu biancu, in cudda mesa ddui iat trexi muntoneddus de croxu de càmbara. Su trexi fiat su nùmeru màgicu de Schidoni, un’atru de is machìminis suus. Aici fiat. “Deu no ndi sciu nudda custa borta, ma si potzu agiudai a ddas agatai” iat nau a scraxu prenu. Po cantu papessit che un’entruxu fiat marriu marriu perou, po cussu dd’iant allomingiau Schidoni. “Àndat beni” dd’iant torrau is àterus, e si fiant lassaus.
Candu fiat abarrau a solu s’onorèvoli Trunfa iat torrau a pensai a totu cussa stòria, duas istatueddas isparèssias de una biddixedda, is duus òspitis, Schidoni e totu s’atru. No ddu sciiat mancu issu su poita ma ddi pariat una cosa de romanzu. Bai circa.
Iat aciapau su telèfonu e iat itzerriau a su marisciallu Màriga. Cumenti dd’iat connotu su marisciallu si fiat trèmiu che folla. S’onorèvoli boliat isciri a ita puntu fiat su trabballu de is carabbineris, si calincuna cosa dd’iant scoberta o ndi fiat bessia a pillu de sa circa insoru. “Nudda po imoi ma sa bia est cudda giusta” dd’iat torrau Màriga. “Spereus” iat nau s’onorèvoli, “Spereus etotu” iat pensau su marisciallu. “Innoi tòcat a si ndi movi diaderus, a fai cosa e manna puru, assumancu po fai biri ca seus afateriendi” pensàt andendi e torrendi in s’aposentu “E totu po duas istatueddas, totu asuba mia!”.
Don Marigosu puru fiat andendi a si crocai, dd’ammancàt isceti de serrai su portali. “Bau bau” dd’iat nau Cantzoni su cani chena de meri chi crocàt in su liminarxu de s’enna. Don Marigosu dd’iat tocau sa conca carinniendiddu a bellu a bellu.
A lugori de luna Schidoni iat detzìdiu de andai a si fai unu giru in bidda, totu fraga fraga. Sa primu cosa chi iat biu fiat sa pinneta de Capitanu. Issu no ddui fiat, cun su tallu fiat. Nci iat ghetau un'oghiada innoi e innia, ma fiat isceti sa barraca de unu pastori. Intzandus nci fiat bessiu a su sartu e dd'iat biu de atesu, pascendi is crabas suas. "Una bèstia geniosa sa craba, totus diversas funt" iat pensau Schidoni de sa tupa anca fiat cuau. Ma Capitanu tontu no fiat. E in su sartu iat imparau a ascurtai totu. Nd'iat boddiu unu trebutzu de terra e nci dd'iat tirau conca a sa tupa. Cussa aina a Schidoni dd'iat petonau sa braba e istampau su mallioni a s'artària de sa pala. Duus istìddius de sànguni dd'iant striddicau sa camba. Nci iat passau sa manu asuba e dd'iat tastau cun sa punta de sa lìngua. Callenti fiat. Iat furriau de palas e si ndi fiat andau.
Andendisindi totu a s'acua iat intèndiu duus cassadoris arrexonendi, Coudu e Umu fiant ma issu no ddus connosciat. Iat provau a ddus ascurtai de atesu ma no fiant unu spetàculu interessanti e sa pala ddi doliat. Aici fiat.
Su mengianu Don Marigosu e Rosina fiant passillendi in sa bia, issa ddi fiat contendi s’ùrtimu bisu. "Gesù Maria!" iat itzerriau sa picioca candu iat biu unu stìddiu de sànguni in terra "Calincunu s'est fertu in cassa e tòcat a ddu curai!" iat sighiu a nai e si fiat posta a curri conca a domu sua. Don Marigosu si fiat incrubau po biri mellus cussas màncias arrùbias in s’arruga.
Su marisciallu fiat impensamentau, cumenti eus nau, su cumandu centrali, s’onorèvoli, sa crèsia, sa bidda, totus si abetànt calincuna cosa de issu, totu asuba sua! A si ndi movi fiat, a fai biri e a fai etotu! Ma ita?
Pensa ca ti pensu Màriga iat detzìdiu de si movi diaderus e de fai cosa manna, finas is giornalis ndi iant a ai fueddau. Iat pinnigau a pari totu is òminis suus e nd’iat pediu àterus a is cumpangias de is biddas de acanta chi si ddus iant donaus. Ma sa cosa de ispantu chi ddi fiat acucada de fai fiat de imperai po sa primu borta in vida sua un’aina chi no imperànt mai, fiat lòmpiu su momentu de dd’ammostai a totus: s’elicòteru. Cosa chi ddi imbidiànt totu is cumpangias de sa cussorxa e chi fiat sèmpiri stugiau, ma imoi tocàt a ndi ddu bogai a luxi, gei nci fiat su tanti. Tocàt a issu a arriri imoi, de in pitzus de un’elicòteru! A nai sa beridadi depiat serbiri po is fogus in s’istadi ma a s’ora fiant in s’ierru forti. Aici fiant.
Iant totu beni preparau. A chitzi mannu iat a essi printzipiada s’operatzioni, totu is òminis in is intradas de bidda, chi moviant conca a su centru, po podi scrucullai in totu is domus, po podi mirai in cara a totus, calincuna cosa ndi depiat bessiri a campu, ammarolla ndi depiat bessiri! Ma su momentu màgicu iat a essi stètiu candu issu de a palas de su monti nci iat a essi stupau a elicòteru, cosa chi mancu in is telefilm americanus! Monti Forraxi si naràt su monti de bidda, po sa basca chi ddui faiat.
Si ndi fiat iscidau a tant’oras de noti, si iat fatu sa braba, si fut petonau; mudau a festa pariat. Fortzis calincuna televisioni dd’iat iscìpiu, mellus a essi prontus a totu.
Fiat andau a sa statzioni, is òminis fiant aproillendi, is canis puru fiant prontus. “Andeus a callentai su motori a s’aina” pròpiu aici iat nau. Issu e su pilota iant pigau una jeep e nci fiant artziaus a monti, anche s’aina, cumenti naràt Màriga. Is atrus abetànt unu fueddu de su marisciallu po nci essiri e inghitzai s’operatzioni. “Movei” iat nau. Su tzaulai de is canis ndi iat iscidau totu sa bidda, sa dì fiat ancora obresci no obresci. Medas si incarànt in sa fentana, atrus nci calànt a sa bia, “Ita dimòniu mègat de acontessi?” si narànt cun un’acìnnidu de ogus. “E ita ndi sciu deu” si torrànt cun un’arrunzada de coddus. Sa giustìtzia sighiat a camminai, tirendi conca a pratza de crèsia, su centru de bidda. Fiant giai arribbendi candu in celu si fiant intèndius tronus e lampus, “Ojamomia ita arrori! Gei si nd’arruit su celu a conca innoi!”. Màriga fiat, sètziu in unu stori chena de pinna, unu stori fatu totu de ferru chi castiàt a totus de in pitzus de su Monti Forraxi. Cosa chi mancu in is telefilm americanus. “No seus agatendi nudda su marisciallu. In custas barracas de bidda no nci at nudda” dd’iant comunicau. Cumenti fiat lassendi su monti po nci imbucai a bidda sa fortza de su stori chena de pinna ndi iat isciusciau sa pinneta de Capitanu, cussu de in bàsciu dd’iat ammeletzau cun unu trebutzu, “Spereus chi no m’apat connotu” iat pensau su marisciallu e iat ordinau de sighiri conca a pratza de crèsia. Biiat giai su campanili, e sa genti in bàsciu andendi e torrendi pitichedda pitichedda. “S’elicòteru est tropu mannu su marisciallu, depit torrai agoa” circànt de ddi nai is òminis suus de in bàsciu, “Ma cali tropu mannu e tropu mannu!” ddis iat torrau cussu totu infogau. “Cala pagu pagu imoi” iat ordinau “In mesu pratza si firmaus, e agoa ndi calu deu, arratza de americanada” pensàt. Su pilota iat circau de ddi fai a cumprendi ca fiat tropu perigulosu ma cussu nudda, po sa primu borta in vida sua si boliat intendi un’eroi. Prus o mancu. Sa pàlia de s’elicòteru, su stori chena de pinna, iat cassau in prenu sa campana de su campanili, cussa ndi fiat arruta a terra cun grandu stragatzu. Totu is chi ddui fiant a ingìriu de sa pratza, totu sa bidda est a nai, ndi fiant abarraus arrentronaus po una pariga de dis. In su sartu fiat aterrau s’elicòteru no in pratza, cumenti si bisàt su marisciallu. Totu sa cumpangia fiat curta ande issu, totu scrabionau fiat e unu pagheddu assustrau, po s’atru totu a postu. Su pilota puru gei staiat beni, su stori invècias si fiat totu spinniau, de mala manera. Màriga si fut petonau e fut curtu conca a pratza, totu sa bidda ddui fiat, cumenti eus nau. Nisciunus teniat su stògumu de scapai fueddu, arrembambius pariant. “Gesugristu miu, no si ddu nau ca no mi creeis” iat pispisau Rosina. Sa mamma si fiat dismajada, torra, ma no si ndi fiat acatau nemus. “No est nudda, no est nudda, torraisindi a domu” tzerriàt su marisciallu a dereta e a manca, ma nisciunus si cinniat. “Gei nci seus nosu, no si preocupeis, gei nci pensaus nosu” aboxinàt. “Gei dd’eus biu cumenti nci pensais bosatrus!” dd’iat torrau calincunu e si fiant incumentzaus a movi cumenti e alluaus. Don Marigosu miràt cussa campana in mesu pratza, e giai giai ddi praxiat, un’òpera moderna ddi pariat. S’ùnicu chi no si fiat mòviu fiat. “Gei dd’apu fata bella!” pensàt su marisciallu Màriga.
Po mala sorti calincuna televisioni dd’iat iscìpiu etotu. Su cumandu centrali aici iat intèndiu sa nova prima de sa televisioni chi no de is fueddus de su protagonista. “Un’imperdonabile avventatezza e un dispiego di forze totalmente fuori luogo” iat nau su giornalista. Cumenti iat intèndiu su telèfonu sonendi a Màriga ndi ddi fiat calau guta, fortzis pensendi ca fiat su cumandu centrali po ddi comunicai sa statzioni noa anca depiat movi, calincunu logu atesu, atesu meda, anca no acontessiat mai nudda, ma nudda perou.
S’onorèvoli Trunfa puru iat bistu sa televisioni e Schidoni puru.
“Bau bau” iat tzaulau Cantzoni, chi pariat cumprendendi totu cuss’acadessimentu. Don Marigosu si fut girau, in buca portàt un’ossu curiosu, bai circa. “Bau bau” iat tzaulau torra su cani chena de meri. Don Marigosu si fut incrubau e iat castiau mellus cuss’ossu. Cantzoni iat obertu sa buca e s’ossu ndi ddi fiat arrutu. Su predi dd’iat pigau in manus: Santu Nàssiu fiat. Cantzoni iat pigau a camminai, Don Marigosu dd’iat postu infatu. Ananti de sa domita sua su cani si fiat firmau e iat torrau a tzaulai. Su predi si fiat incrubau e nci iat istichiu sa manu aintru de sa domita. “O su meri si podit?!” iat nau brullendi e castiendi sa bèstia. Un’atru ossu ddui iat aintru: Santa Arrita fiat. “Bravu Cantzoni. Venutu si ndi iat a essi prexau” dd’iat nau carìnnia carìnnia.
“Ritrovate le due statuette lignee misteriosamente scomparse” iat nau sa televisioni, de pressi de pressi. Totus dd’iant intèndiu.
“Totu po unu santu bèciu de linna. Antzis duus.” iat nau Don Marigosu.
