|
20/06/2004 Eletziones regionales-Renato Soru at bintu e cun issu isperaus chi apat bintu sa Limba. Limba: como est tempus de guvernare E duncas Renato Soru at bintu. Ma sa limba sarda at perdiu o bintu custas eletziones? Renato Soru e Mauru Pili ant foeddau pagu de limba. Soru, po nàrrere sa beridade, at presentau meda su discursu de s'identidade e una bia nd’at arresonau in d’un’intervista in La Nuova Sardegna. In su programa puru ddue iat carchi cosa. Meda nd'ant foeddau Giagu Sanna e Bainzu Sale chi peroe funt andaos male meda e ant pigau pagu votos. Mariu Floris foeddat de identidade e natzione sarda, ma mai de limba. Unu arresonu chi no aus mai cumprendiu. Como is betias de campagna eletorale funt finidas e benit s'ora de ischire chie at a fàere s'assessore a sa cultura, e duncas a sa limba. Nòmenes si nde faent medas e non est custu su logu po nde ddos tirare a foras, o fàere nos puru su mestieri chi depent fàere àteros. A banda is nòmenes, ispereus chi sos chi ant a tènnere sa responsabilidade fatzant una polìtica po sa limba chi siat pretzisa, eficatzie e longa. Longa poite po otènnere arresurtaos in custu particulare masione ddue cheret totu su tempus chi bolet unu apariciu tostau comente cussu de torrare in setiu una limba chi si nch’est morendo. S’istadu de sa limba, a su mancu a parre nostru, est sèmpere malu. In domo su foeddare est impaghiando, in paricios logos de s’ìsula su sardu est ispariu de sa sociedade. In iscola, sa lege 26 no est galu arrenescia a produere efetos seguros. Sa disamistade intre Limba Sarda Unificada, variedades e Limba de Mesania, at postu impedumos a unu traballu uniu a su mancu de cussos chi ddue credent. Fintzas a custas eletziones no est bessia crara sa voluntade de is chi bolent su bilinguismu, e dognunu est andau po contu suo chene fàere mancu unu manifestu comunu de presentare a is polìticos candidaos. Sa lobby chi arrenescent a fàere is artigianos, is cassadores, sos disamparos e àteros, po sos “limbudos” est unu bisu ebbia. Como peroe est tempus de guvernare e is chistiones de isciollere funt medas. S’assessore at a tènnere meda de tribulare. |