|
1/06/2004 Limba e Imprenta/ Unione Sarda de su 13/3/2004 Su Paba faeddat in romanescu:e sos predis sardos? de Mariu Ghiacciu Custa esti una littera pubbrica a Preu Giuanne Dore, vicariu de Tadasune. Ma ite lat bènnidu a conca, s’atera die, a su Paba (Issu chi connoschet 60 e piùs limbas) a faeddare in romanescu? Za lat fattu su mezoru! In pagos minutos at bettadu a terra s’ispot televisivu chi tue as imbiadu a tottu sos italianos po azuare s’Ecclesia. Su ministru de sa Repubbrica Bossi, indignadu (sende indignu), nos at cossizadu de no frimmare po sotto po milli, gasìe nachi bos cheret bier andande isculzos a pè in terra! Ma lassamos cussas bessidas maccas (orrios de ainu no pigan a chelu), no est de custu chi cheria arregionare. Penso, masprestu, a Cussu Sant’Omine chi at crefidu onorare sos Romanos faeddande sa limba issoro, e comente fuit cuntentu e cantu s’est ispidientadu! Ma, tando, puite sos predis de innoghe, nàschidos e pesados in Sardigna, no faeddan in sardu, nessi in sas preigas? Itest chi los brivat, o si trattat de preitta? Tzertu los timis cumprender mezus e sa limba nostra tiat prenettare pius a fundu in sas intragnas de su coro. Puite no sighin s’esempiu tou chi, dogni annu, naras sa missa in sardu po su Santu Nadale, tottumpare cun sos fideles, in nomen de su Babbu, de su Fizu e de s’Ispiritu Santu? Nàrami Giuanninu, si podes, ite aiat detzisu su Conciliu Plenariu Sardu, in Aristanis in su 2001, po simpreu de sa limba sarda in sas funtziones religiosas, ca nois de fora no ndischimos nudda! Si lu cherides fagher, sos Predis, tenides unu podere mannu (paris cun sas famiglias ei s’iscola) po chilcare de salvare sa limba sarda. E comente in su passadu lazis impittadu po labolire, gasi oe, impreandelu po su bonu, nde tizis tenner meritu mannu e riconnoschentzia. A nde cherimos chistionare? Si soe istadu irriguardosu perdonami e si appo peccadu ghiaminde s’assolutzione, ma no sias troppu pesante in sa penitentzia. Mario Ghiacciu |