|
18/06/2004 Limba e imprenta/18-04-04 Ohi, sa limba sarda de B.Bardi Commo non sinde podet prus abberu! Custu manzanu so' intrau a mi bibere unu caffè in su Cursu in ube 'e sas de Capelli. No appo fattu mancu a tempus a apperrere sa bucca, chi si m'an inghiriau e m'an contau s'urtima. Nan chi sun andadas sas de s'uffissiu de sa limba pro lis pedire de ponnere charchi abbisu in sardu in su locale. A sa prima lis pariat chi sinde podiat negossiare, ma cando an bidu ite lis fin juchende las an bocadas fora. "Non bio proite in Nugoro depimus iscrivere in custa limba casticada chi non si cumprendet it'est. Ma da ube che l'an bocada a campu?". Mi narat una. "In sa janna poto ponnere intrada ma essida no, non si podet azzettare, si che lu deppen bocare dae conca: pro parte nostra inoche non bi l'an a biere mai. In Nugoro si deppet iscrivere in nugoresu. E a tottu mal'andare si unu propriu bi tenet a faveddare e a iscrivere su 'e sa bidda sua chie liu proibit? Ma nois non deppimus essere obricadas pro decretu a faveddare e a iscrivere ind una limba chi non nos appartenet e chi non est de nemmos". Tando non so' solu! Custu est su chi pessan in medas. Sa beridade forzis est chi custa limba la connoschen pezzi sos chi c'an postu in cuss'uffissiu e chie los cumandat. Bonu prode lis facat, ca lis an dau su traballu. Ma si fit pro ch'isconzare su fattu menzus a los pacare de badas, bastet chi non facan dannu comente sun fachende. Su bellu est chi issos, sos de s'uffissiu, no de s'uffitziu, sun cumbintos de aere imbentau sa pruvera e chi sun in su zustu. Non de atteru, sun punnande a bi ponner manu no in sos zilleris ebbia, ma in cale si siat locu, in ube, sicunde issos, si deppet iscrivere in custa limba chi paret issia dae un'obu ?e pasca. Commo cheren iscrivere finas sos abbisos in s'ospidale. Deus nde sarbet. Cherjo biere ite s'imbentan. No est chi siat una cosa ?e nudda. B'at modos de narrer chi in sardu mancan sas paragulas e cussas bisonzat de las piccare in prestidu. Su malu est chi a bortas si diat podet narrer sa matessi cosa ind una attera manera, chene la furriare dae s'italianu curzu curzu comente amus bidu finas a commo. Ma su pejus est chi chin custa limba unificada non b'at abbarrare prus nudda de sos limbazos finas de sas biddas, sende chi in cada bidda b'at carchi cosa chi la distinghet dae s'attera. E propriu custa est sa bellesa ei sa ricchesa. E tando, proite in cada locu non si sichit a faveddare su connottu e non sind'accapidat su chi b'est, prima chi s'abba 'e s'irmenticu, ei sa limba sarda unificada, che canzellet cantu b'at? Nemos ischit tottu, ma cadaunu ischit carchi cosa. Bisonzat chi tottus carren a su muntone e no a bentulare a un'ala e a s'attera comente semus biende. A pustis amus a pesare su chi bi essit a campu e bi s'at a poder torrare a ponner manu pro fachere regulas chi bazan pro tottus. Bastet chi custa borta sos chi nd'ischin abberu, non nois, arzien sa boche e si facan intendere chene si fachere piccare in trampas dae sa politica e dae sos chi pessan de essere ischios ca si lu naran tra issos. B. Bardi |