Custus tres "arrogus" de poesia de Venutu Lobina funti un'amostu de su
cuntrastu in s'arreligiosidadi de su poeta de Bidhanoa Tullu, cuntrastu ki
s'esti amanniau in su tempus. Su poeta pàssada de s'arreligiosidadi de sa
pitikesa a cudha prus matuca de sa becesa candh'issu mannu e cun fillus si
contada de sa morti de su babbu e cumenti si dh'esti bivia.
Po cantu bidhanoa
Editzionis Mesuterraneas 2D Castedhu-Tatari 1987
pàginis 54/58
segundu volùminu
Candu mama nosta e babbu nostu funti mortus de medas annus, e su disprexeri
s'adi cambiau faci e ungas, a bortas sutzédidi ki si pentaus de no dhis
éssiri pregontaus certas cosas, candu fùanta bius.
Deu, po nai, mancu sendu mannu ia mai pregontau a babbu miu poita issu puru
ìada pigau sa tessera e su distintivu. Si dh'ìada postu, su distintivu, in
su trau de sa bestimenta de lana, birdàngia, candu s'ìada fatu sa fotografia
per la carta d'identità, ki fudi obbligatòria. E ita ìada nau mama? Pagu e
nudha: "Su mèri ses tui...". Ma issa no ìada cambiau bidea.
Dha tengu deu, cussa fotografia de babbu, arrubiasta, cun d-unu arrògu de
timbru in d-unu àngulu: "COMUNE DI VILL...".
Babbu esti sétziu in d-una cadira, castiendu aillargu cun is ogus ke is de
fillu miu, sa scriminera a una parti, pagus is pilus, e is manus obertas
imbaradas a is còscias, una in donniuna.
Is manus de babbu miu fùanta mannas ke is mias, ma no "civilizzate", ke is
mias, fùanta grussas, dónnia didu su dópiu de is mius. Is venas ki de is
manus artziànta a su brutzu fùanta grussas ke funis.
Is manus de babbu miu no fùanta fatas ke is manus de is àturus óminis,
fùanta fatas de un'àtara pasta, fortzis in s'impastu dhu ìanta imbesturau
ferru e linna, luxi e amori, e su fuedhu sentza de fuedhus cun su cali babbu
miu fuedhàda cun is cosas, tokendidhas.
Is manus de babbu miu fùanta duas manus deretas, sa manu de manca puru fudi
una manu dereta, si no comenti ìada éssiri fatu a kistionai a duas manus cun
d-una matixedha ki fut prantendu, po dh'arrecumandai su ki depìada fai po
cresci manna e sana, po cresci a lestru, po si difendi de is babbillotis, de
sa néula e de su sicori? O cun d-una mata, cun d-unu sarmentu ki fudi
pudendu, candu ndi dhi bogada sa linna bécia comente ki féssidi
boghendundedhi unu bestiri béciu e malifatu, e dhi promitìada, cun is
fuedhus de cudhas manus mannas, unu bestiri nou, bellu, ki dh'ìada éssiri
portau Beranu candu ìada éssiri arribbau e dh'ìada éssiri bista pronta a si
dhu ponni?
E is manus de babbu miu candu fìada un'infertura, féssidi a ogu o a pértia?
Tandu is manus depìanta fuedhai de prus, depìanta cumbinci. Primu cun sa
pértia o cun s'ogu, pustis cun sa mama de sa pértia e de s'ogu in su momentu
ki fudi de bonamori candu "tirada". Is manus fuedhanta, fuedhanta e naranta
a sa mama ca s'ogu o su pitzu, postus in bratzus a un'àtara mata, a una ki
non donada o ki fudi de àtara arratza o prus cumuna, ìanta éssiri créscius,
s'ìanta éssiri fatus mannus, una mata noa, bella, prena de frutus e de nius,
e is mamas-matas lassanta fai a is manus ki naranta scéti sa beridadi.
Sa mata ki no donada o ki fut prus cumuna, invecis, si lassada cumbinci
luegus, fudi arròscia de bivi sentza de fròris bellus o de frutus saborius.
Candu babbu miu s'acostiada a custas matas cun sa pértia ki incurtzada fudi
diventada unu pitzu, sa mata ìada giai cumpréndiu, no dhu ìada bisóngiu de
medas fuedhus de parti de is manus de babbu.
A is prìmus de Beranu, babbu torrada a passai acanta de sa mata pudada,
acanta de sa mata inferta. Sa mata pudada fudi ponendusia su bestiri nou, is
ogus, is gemas, fùanta unfraus, prenus: babbu dhis passada a asuba, cun
delicadesa, is manus suas mannas, e candu si
furrìada is froris cumenzanta spannai, pustis benìanta is frutus, e fudi
totu unu miràculu. Tenei passiéntzia, fudi babbu miu.
Ma si dhu boleis sciri, si potzu nai puru ca a babbu miu dhi naranta Su
Butegheri poita custa fudi s'arti sua. Fudi beniu a Bidhanoa giovonedhu, de
un'àtara bidha, e ìat postu butega, sa primu butega de Bidhanoa. Fudi stétiu
babbu su primu a betiri su cafeu, cruu, ma is bidhanoesus no scìanta eita
fudi. Calincuna fémina perou dhu ìada comporau su própiu, po no fai biri, ma
no scìada comenti dhu fai. Tandu dhu ìada cotu a budhiu e dhu ìada cundiu
cun ollu e axedu, ke s'intzalada. Ma fudi malu, malu. Tostau e marigosu. Dh'ìada
nau a Su Butegheri, e tandu babbu ìada fatu arribai turradoris, molinetus e
cafeteras.
De candu babbu si fudi coyau, in butega dhu abarrada pagu, dhui lassada a
mama, ca dhi praxìada de prus. E issu si ndi andada a bìngia, a Su Ladus, a
sa bìngia ki fudi stétia de Antoni Maria Mulas, e innia pudàda, inferìada e
kistionada cun is matas cun cudhas manus mannas mannas ki parìanta pàlias de
argiola.
Pustis issu puru ìada circau de diventai propietàriu, ma fudi un'arti ki no
fudi sa sua e nc'ìada pérdiu totu.
Cosa de no crei, babbu puru ìada tentu dus génnurus maresciallus, de is ki
apu nau innanti, unu de finantza e unu de is carabbineris. Ma in bidha dhui
fùanta abarraus pagu, fùanta torraus a is logus insoru.
Babbu fudi mortu a pustis de cincu dis ki su dotori dh'ìada proibbiu de
andai a bìngia, poita a fai cussa pigada dh'ìada éssiri pótziu fai mali a su
coru.
Cumpostu in su letu parìada biu. Cudhas manus suas mannas ki kistionànta cun
is matas e cun dònnia cosa de linna o de ferru, imoi fùanta firmas,
scumpartas fintzas de is venas grussas ke funis. Si dhas ìanta trogadas, is
manus, cun d-unu arrosàriu niedhu, ki segundu sa genti ìada éssiri nau a
babbu calincuna cosa del regno dei cieli. Ma s'arrosàriu fudi fatu de una
linna morta ki babbu no ìada connotu, e no dhi narada nudha.
E pustis babbu no dh'ìada éssiri ascurtau su própiu: s'arrosàriu fudi unu
strepu ki is manus suas, bias, no ìanta umperau mai.
"Terra Disisperada terra"
Jaca Book, Editzionis natzionalis sardas, scritus a pitzus de sa
dipendentzia, Milanu, 1972
