No funt is mascaras sardas e mancu cussas furisteras chi faint bellu su carrasegare de Samugheo.
No est s'isfilada o s'organizatzione de su comitau ci ddu fait galanu e unu pagu misteriosu.
Est prus che àteru s'ispiritu de sa gente samughesa ci si bolet sèmpere ispassiare cun ànimu simple ma forte. No ddue at folclore o folclorismu e mancu isprolocos de trasmissiones televisivas isponsorizadas.
Po "Maimone", su carrasegare de Samugheo, dogni annu si torrat a rinnovare su mistériu de sos sardos chi s'atobiant a pare po éssere issos etotu.
Mancari totu paret chi andet contras, mancari in citade sos radical-chic pensent chi sa Sardigna de Mesu dd'apat imbentada s'Esit, mancari sos gialistas s'inchietent e pensent a taglios noos, cuddos sardos de Samugheo sighint a faeddare su sardu, a ballare, a bufare, a arrejonare trancuillos in pratza, a éssere...
Dominiga passada puru, su 12 de freargiu 2006, Maimone s'est torrau a pesare.
E a pustis de s'isfilada de mascaras bellas o légias (nde ddua iat fintzas islovenas ocannu...), totu sa pratza s'est prena de bella gente sarda papandosinche una tzipula, bufandu una tassa de binu, ballando su ballu sardu, arrejonando e contando sos contos...
