S’arrejonamentu chi bogio faere cun custu articulu est unu pagu delicadu e fortzis istranu.
Seo de binti annos chi bivio e treballo a Bologna e depo nàrrere ca apustis de tantos annos, a parte sa familia e sa terra, dhu at una àtera cosa chi mi mancat prus de donnia àtera: foedhare su sadru.
Est comènte a una arreighina posta in su centru de s’anima chi petit sèmpere abba e no morit mai, A bòrtas, fintzes in riunione de treballu, m’acato ca seo foeddhando in italianu e pentzando invece ind’unu ammesturu/koinè de sadru, est comènte chi su sadru m’aggiudet a arrefortzare su cuncettu chi agoa che ispodhico in italianu.
Ma no est de custu chi bògio foedhare, ma de àteru. De pagos annos seo diventadu babbu de una pippia naschida innòghe a Bologna, de penas chi at cumenciadu a foedhare apo pentzadu: "No ada a foedhare mai su sadru! Una figia mea!". E labae ca in custu cunssideru si jogàt totu su futuru de sa limba sadra. Podet pàrrere assurdu chi geo bògia faere impreare su sadru a una figia chi ada a bivere sèmpere innòghe (..mm..custu fortzis no est seguru) e invece custa idea est ammadurando mescamente biendo is figios de is "istrangios" chi che funt a Bologna: totus foedhant in italianu ma fintzes in sa limba de su babbu o de sa mamma. Figios de copias ammesturadas, dhos intendes foedhando in russu, arabu, africanu!
E poite tando figia mia non depet imparare su sadru? Una limba si dèpet considerare no po su valore economicu e "amministrativu", ma po su valore culturale chi tènet. E bastat a biere comente su dialetu emilianu dhu foedhant solu is antzianos: àteros deghe annos e est morta de tottu.
Bàstis, apo cumenciadu cantando a figia mea cantzonedhas po pipios in sadru, (..is pagos chi m’arregodo) e ateras sempere in sadru dhos invento. Certu de dhi canto fintzes in italianu, ma cando dhi petio: "Ite cantzoneddha boles?,’ arrespondet cun is primas rimas de is canzoneddhas sadras, ca poite intru cussas canzoneddhas est imprentau s’arrastu mitolgicu sadru chi s’innestada cun su sèmene geneticu de sa pipia, dhu jughet giai intru suo, sa canzoneddha simpremente si de dhu ischidàt.
