Ah... gratzias a Deus istamus bene. Nois istamus bene!
Istamus propriu ‘ene.
Su travallu in bidda b’est. B’amus sa frabica, pastoritzia no bi nde mancat, tenimus iscra e asprine. Su logu est totu bene pulidu. Ah, balla... in bidda mudregarzos e titionarzos malos no che nd’at prus! Totu pratostabile mih! Aba a nastru, dae cando ant fatu su pompagiu pro su turisimu. Agricultura bi nd’at meda e tenimus finas sa forestale.
Laore, ortalitzia e petza in cantidade. Su late est bene pagadu e su preju est una roca: prus istabile de su dollaru e de s’euro, dae trintannos, no minimat mai!
Insomma, no nos podimus lamentare, là. Onzi familia finas a tres vituras... e su sapadu die die in Tzitamercato a papare panadas americanas e a pompiare sas vetrinas. No che a cando mi pesaio deo, istitadu a murta e a pirastru, a pe, chena mancu ainu, e a recuire a bidda duas bortas s’annu cando no fit faladu su riu.
Como semus zona turistica! Cumpresu as? A pagora dae mare, dae su monte e dae tzitade.
Amus fatu sos murales, su nuraghe, su grupu folk, su tenore, su coro, sa proloco e s’iscuadra de fubalu in prima categoria.
E istranzos...
Innantis teniamus petzi sas festas. Cussa patronale no balet a nudda ca est in bassa stagione e tocat de li cambiare data. S’Onorevole Tzarras at nadu chi si no est organizada comente si tocat e in tempus giustu, no bi benint turistas de gabale. Como faghimus tres sagras in istiu: cussa de sas tamatas friscas, sa de su pomodoro doc e cussa de sos ignochetis sardos cun bagna. In beranu nant chi cherent fagher finas cussa de sa birra traditzionale pro anticipare la stagione. Fintzas s’autunno como ant fatu, menzus de s’atonzu ebia, chi bi fit antigamente cando fimus totu ignorantes. Su Comune faghet finas s’estate, in istiu.
Benint dae onzi parte e logu, a nos istudiare e nant chi semus abistos meda: “Che bene che lo parla l’italiano... ma studiato ha lei?” M’at nadu unu professore toscanu chi benit a piscare e a catza onzi annu.
E pro durare... sos chi imbetzant e cabulant sos norantanoe annos, giompent finas a chentu. Ca tenimus su genioma nuragicu in su sambene! Lu narant sos iscientziados e b’est finas in su libru.
Cussos si chi l’ischint sa cosa... ischint totu e meda! No che a sos istudiadeddos nostros chi sunt bonos a manigare ebia, mandrones...
Tedescos, ingresos, russos, americanos e ispagnolos benint fitianu a bidda, a viazu pagadu dae sas universidades importantes! Finas unu tzinesu chi at fatu unu libru e ischit faeddare su sardu... ma bene mih, est bennidu, custu passadu e li ant dadu finas sa medaglia pro cussu! Cun sa grammatica giusta: paret italianu! No che a nois chi lu faeddamus galu a s’antiga - a naradura - sena iscola. Comente lu faeddant e l’iscrient cussos, paret una limba aberu: finas deo chi no apo iscola nd’apo cumpresu carchi paraula, ca no so tontu e tenzo finas unu fradile poeta.
Naras tue, istamus bene aberu, in bidda.
Deo cando mi che ghiro in totu dae Germania – oramai sa domo poscas de trintannos chi so fora l’apo fata, ca mancat petzi sa teula e su rebussu - mi aberzo finas su beterbechefas, gai, cando benint in s’istiu sos piseddos meos, chi oramai sunt cojuados a Germania e istant bene inie, tenent a in ue recuire e batint finas clientes.
S’ateru sero sa televisione at nadu chi si che andant sos militares de sa base.
De una manera est lastima ca su sartu nostru fit importante – finas sos de su guvernu cada tantu benint a fagher tzerimonias – e si no est faula, sunt nende chi faghent unu villagiu de tremiza letos e prus in cussu tretigheddu chi est abarradu boidu in sa marina de bidda: gai si, chi nos sighimus a mezorare! Cando agabant sos fraigos, sa zente lassat su traballu pesudu de s’edilitzia e si dait a cussu prus lebiu e pulidu, de servitziu in cughinas, in cameras, sala e gai... Diat esser una cosa manna si diant fagher finas una bell’iscola arberghiera, intames de viazare a tzitade a sos liceos e universidades – cun totu sos iscientziados istranzos chi bi sunt, narami tue - in ue lis ponent petzi machines in conca e poscas no agatant traballu.
E su portu, si lu diant fagher aberu... nant chi ant fatu finas sos sondagios e no andant a dainnantis pro bator puddas de aba e unu fiotu de corvos ambiddarzos. Cun s’iscusa chi est zona umida (no at abarrare umidu su matessi cando bi sunt sas barcas...) ponzende mente a sonniadores mandrones, lassant chi sa paule si che ingullat su logu e abarret totu comente a milli annos faghet: titula e arana!
Idende ses, chi no semus bonos a nudda? Tene passentzia, perdona: tue as finas istudiadu, unu pagu, si no fago errore. Si fis istadu unu de cussos cherveddones furisteris o finas sardu etotu (ma chi biveret nessi fora) como, su chi ti so nende ti lu fis rezistradu e lu fis postu in su giornale pro valorizzare e promuovere le potenzialità del nostro territorio. O male cantu andat l’aias nadu - a progetu - in sas iscolas artas e ti fint dadu finas dinari. Ma nois a custas cosas no bi pessamus...
Nois... istamus bene. Tropu ‘ene, fusilada!
