Est in programma po su mese de gennargiu 2006, in Roma, sa prima Cunferéntzia de sas Minorias Limbistìcas Italianas. Ant a participare sas rapresentativas de de s'Istadu, de sas Regiones, de sos comunes, de sas istitutziones locales e de sos sotzios chi amparant sas limbas de minoria matessi. Enrico La Loggia, ministru po sos afares regionales de su guvernu Berlusconi, at annuntziau s'initziativa calchi die a como in Palermo. In sa cunferéntzia s'at a foeddare de sos primos annos de aplicu de sa lege 484/99 e de sos primos arresurtados bonos, chi peroe, a parre de osservadores medas, non sunt bastantes. In particulare po su sardu, chi galu non connoschet una tutela de livellu sériu in iscola, medios de massa e amministratzione pùbblica.
