02/12/2004 Parres lìbberos - Jazz, Lirica e Musica Sarda
Pro cale artes devet gastare sa Regione?
de Micheli Tedde
Apo lègidu cun interesse meda s'artìculu de Francesco Abate publicadu in s'Unione Sarda sa chida passada, e dae su diariu limba postu in sa "rassigna de imprenta".
S'argumentu fit sa protesta de sos sotzios culturales chi si ocupant de ispetàculu e prus de totu de mùsica jazz in Sardigna.
Issos sunt contras sos finantziamentos, mannos meda pro sa veridade, de s'Assesoradu de sa Pùblica Istrutzione de sa Regione , in favore de su Teatru Lìricu. E, pro custu si podet nàrrere chi ant rejone puru.
Ma cussu chi sardos meda non cumprendent, est pruite custos finantziamentos devent andare a sos ispetaculos de s'ENTE LIRICU e de su JAZZ ebbia? Pruite devent essere issos ebbia a si che ispartire sa bona parte de su dinare chi sa Regione ispendet pro sos ispetàculos de musica in Sardigna?
In su fine de s'artìculu b'at una dichiarascione, chi narat «mentre a noi spesso si chiede conto dei numeri, spese raffrontate agli incassi, a qualcun altro questo discorso non si ha il coraggio neppure di farlo. E sin qui può anche starci bene, perché non è da quanti biglietti stacchi che si può valutare la buona riuscita di un'iniziativa culturale, ma che la regola sia uguale per tutti».
Gai, si narat chi no est importante meda canta zente andat a bìdere e intèndere sos ispetaculos e sa musica chi issos o ateros organizant, e si che la leat cun sa burocratzia chi cheret ischire sos contos, e comente ispendent su dinare custos sotzios. Deo, cumente e totu sos sardos, creo chi siat pretzisu a ischire comente su dìnare pùblicu est ispesu, e canta zente, ant interessadu custas initziativas.
Sa pregunta mea tando est custa: pruite s'Assessoradu de sa Pubblica Istrutzione, e Ispetàculu e Isport de tota sa Sardigna devet ispendere dinare pro manifestasciones chi no ant pùblicu meda? O est mezus a nàrrere chi est pretzisu acuntentare tota sas divescias variedade de musica e de genere ma non sèmpere sas mantessi.
In Sardigna no b'at su Jazz ebbia, amus sa musica nostra puru. Pruite custos sotzios tribagliant pro sa musica de importatzione ebbia, pruite no tribagliant pro faghere connòschere sa musica nostra, innoghe cun ateros ojos pius modernos, e in ateros logos puru? Deo creo chi custos sotzios tribagliant pro issos, pro paga zente "d'èlite". Sos àteros sardos no contant nudda, sas ateras musicas nudda. Sa musica sarda est "grezza" per "biddunculi".
In Sardigna amus una cultura chi s'est remunida in sos annos
ballos e musicas nostras. Chi si sunt reduidas a unu sterile folklore, pro sos turistas puru, chi narant chi sunt bellos, ma folcloristicos e pagu sentidos in su coro de sos sardos. Sos sardos etotu los rifiutant pro no s'intendere divescios e pagu cosmopolitas.
Sos sardos de s'internu ebbia sunt chilchende de la muntennere bia custa cultura, ma est difitzile meda si sa Regione Sarda est sa prima chi no lis importat nudda, e pensat a su jazz e a su teatru liricu ebbia.
Cando sas Istituziones manna l'ant a cumprendere s'importantzia de una "cultura globale sarda"?
Amus totu! Su ballu natzionale, su cantu a tenore (reconnòschidu comente patrimoniu de s'umanidade puru), sos istrumentos nostros originales, sa limba nostra, ite cherimos de pius?
E cando l'ant a cumprèndere sos sardos chi sa cultura issoro est bella e ispetziale e chi si bi creent ant a èssere pius fortes e ricos?
