Bella serada s’attera die in Cagliari. Bi fin sos menzus intellettuales sardos a cunsonu, a legger sas operas issoro pro una bona causa de beneficenzia. Ospites istranzos e zornalistas chi contana e in prima fila su presidente nostru Renato Soru. E tottu sa Cagliari bene, mancu a lu narrer. Itte fini custas operas chi ana leggidu? Calchi poesia, ma mescamente contigheddos “alla moda”, bene inseridos e inquadrados in sa narrattiva nazionale, perfettamente inseridos diamus a narrer. Itte pessades chi sos ospites istranzos apana intesu faeddare de cultura e limba sarda? Troppa grazia diat esser! Sos contigheddos innocuos andana bene, pienos de espressiones continentales e bellos italianismos pro nos sentire pius unidos pesso. Sa zornalista milindrosa de una tv rezonale, issa puru in prima fila isculta chin attenzione preparende su serviziu pro nos informare de tottus sos fermentos culturales de custa terra nostra, comente pezzi issa ischit fagher. Bi son guasi tottus sos zallistas sardos de oje prontos a isfilare e a nos regalare s’arte issoro pro nos aberrer a su mundu e superare sas barrieras de s’etnicidade, nana issos. E su presidente nostru iscultat attentu issu puru, e faghet bene. Che finit sa serada, basos e abbrazzos, complimentos e istrintas de manu a tottus, menzus de ai itte cherimus?
Custas dies ada bessire su serviziu in sa televisione, pro nos informare issubra de sa letteratura salda, folzis l’ada biere fentas Soru e folzis ada pessare de dare atteros contributtos a custos bravos artistas chi nos faghene onore in tottue, mancari chin d’un atteru festival in su zentru de Saldigna e mancari chin d’una bella isfilada de moda in mesu, proitte nono? Custa si chi est cultura! Bai cheret ispesu su dinare de sos saldos! Atteru che sas barrieras de s’etnicidade! Abeltura bi cheret!
Custu contigheddu boll’happo fattu, fentas esazerende, pro bos dare a ischire una cosa chi folzis azis zà cumpresu menzus de me’: comente si dana sos contributtos a sa cultura in Saldigna. Nois chi amus votadu a Soru, pro su chi nos hat nadu in sa campagna elettorale nos isettaiamus pius identidade in sa politica sua, ma fentas ai como non nd’amus bidu meda, nacchi bisonzat a isettare ancora, a dare tempus, istamus a bides tando. Intantu custa assessora noa non s’est presentada troppu bene, a mie mi parede, seghende a dresta e a manca ma mescamente pro sa cultura e sa limba salda. Sos zallistas sun capazzes a si organizzare, a invitare sos zornalistas chi contana e a su presidente Soru, e sos iscrittores in limba salda sun galu dolmidos, semper disunidos comente semper lu sun istados, e nemmancu una boghe si pesat a si lamentare o a los rappresentare, si b’est puru custa boghe, eo non l’isco.
Mi rivolgo direttamente a sos iscrittores sardos: su dinare pro sa limba salda bocche lu furana e bois bos cagliades a sa muda. Ispendene pro d’onzi cosa e andat sempes tottu bene, sa limba si che l’ilmentigana e andat bene su mantessi, tando, si bos andat bene sighidela oi.
E pro finire chin d’una banalidade, bi cheret unione, jà si fit cumpresu, e a si che ischidare puru!, ca a sos iscrittores saldos che lis sun furende s’issoro e a mie mi paret ca non si nde siana nemmancu abizzados ancora!
Avvisu pro sos tontos: non s’ischit mai, ma menzus a lu torrare a narrer, naturalmente d’onzunu est liberu de iscrier su chi cheret in sa limba chi cheret, ponimus zallos in italianu, tantu pro fagher un esempiu, andat bene, però sa possibilidade e libertade de sos zallistas non devet apeigare sa e sos atteros chi iscriene in saldu, sempes pro fagher un esempiu, nen si dian deves permittere zertos “consulentes” de narrer “dinare a custos emmo e dinare a cuddos nono” pezzi ca che sun a s’attera banda o pessana chi lis podan dare fastizzu in calchi manera o che lis podan furare custos beneittos finanziamentos pro sa cultura in Saldigna.
Isperemus de non ch’arrivvare mai a sa gherra tra poveros, ca propriu non nd’amus bisonzu, o a su “mors tua, vita mea”. Podet andare bene s’una cosa comente podet andare bene s’attera e tottas duas umpare poden andare bene.
Istade bos bene e a nocche ischidare dae su sonnu tottucantos.
Santinu Bannittu
Nota de su ghiadore:
No ischimus chie est s'autore de custu articulu ma amus retziu e detzidimus de lu pubblicare ca non b'at ingiurgias contras a niune e cumpartzimos bona parte de su chi narat. In cantu a sas boghes chi si nche pesant po difendere sa limba, su Sotziu Limba Sarda l'at fattu e l'est faghende. A bias fintzas chene aere su consolu de s'azudu de sos iscrittores in sardu. Paret chi sos giallistas apan cumpresu comente est pretzisu a si nche organisare mentras sos nostros sunt prus impignados a sighire sas andalas lughidas de su narcisismu artisticu, de sas milli limbas pessonales e de un'impignu culturale chi si riduset a una limba de afetos, sentidos e surrungios meledosos propiu gai comente la cherent sos innimigos de sa limba. A nàrrere sa beridade a sas fainas nostras poetas, iscrittores e artistas in limba nd'amus bidu, e li torramus gratzias. A sos àteros nois puru naramus ca est ora de si nd'ischidare. Po andare a innantis sa limba at bisonzu de fortilesa e de unu progetu polìticu limbisticu de medida manna. Fintzas pro cuntrastare cussos de sos zallistas chi ant detzisu de fagher gherra a sa chi issos giamant "etnicidade". A nois paret chi Soru apat cumpresu medas de sas trampas de sos disfamiadores de prufessiones e amus ispera in s'atzione de su guvernu regionale. Isperamus chi sos iscrittores sardos in limba l'acabent de drommire e torrent a gherrare.
