Pagu prus de tres annos e mesu fait, su 13 de Maiu 2001, est mortu unu poeta, imparadori e omine balente: Faustinu Onnis. Fiat nasciu me in Santu ‘Aingiu in su 1925. In sa vida sua, prima de si fai connosci in totu Campidanu cument’’e su maistu de rimas e de limba e cultura sarda, hiat fatu unu pagu de totu, poita chi in su tempus de sa pipiesa sua sa vida no fiat unu giogu. Issu, po de prus, fiat aturau orfunu (ddi fiat mancada sa mama candu teniat feti noi annus). Po custas arrexonis,
pustis de essi acabau s’iscola elementari, hiat cumentzau s’imparamentu ‘e su tribagliu. A s’edadi de dixiaset’annus,in su 1942, candu fiat mobilitau tzivili po sa costruidura de casermas militaris me in Iglesias, fiat istetiu denuntziau a su tribunali militari po atividadi avolotadora e apetigamentu a Mussolini po nc’essi ghetau is matonis a terra narendi: -tengu famini-. Po cust’arrexoni fiat istetiu iscritu me in s’anagrafe alfabetica de is antifascistas. De pustis de s’acabu de sa gherra e fintzas a su 1951 hat tribagliau po torrai a costruiri su sderruimentu lassau de is bombas e pustis hat fatu atrus tribaglius, finzas a lompi a su 1957. A partiri de cuss’annu hat cumentzau a tribagliai cument’’e infermeri e dd’hat sighiu a fai finzas a s’edadi de sa pensioni. Fiat un’omini chi teniat medas passionis e interessus chi portaiat a innantis cun su prexu chi ddu distinghiat.
Infatis ddi praxiant medas cosas,in mes’’e is calis nci fiant puru s’atividadi politica e cussa sindacali, ma is cosas prus de importu ddas hat fatas in su campu de sa cultura. Infatis,cumenti hapu nau cumentzendi cust’articulu, fiat unu poeta de balentia manna po essi fatu parti po tempus meda de su cunsillu e de sa redatzioni de s’arrevista literaria “S’ischiglia”, aundi in d-unus cantu
articulus hat chistionau de is cantus popularis e de is poetas improvisadoris de Campidanu. De su chi hat produsiu literariamenti tocat arregordai s’arregorta de poesias”Perdas”, aundi podeus ligi puru is versus incantadoris de “Scurigadroxu de sa zriva” chi cantant aici :
Pampas tremi-tremi
de unu soli mori-mori
chi no si bit prus in celu.
Fogus fuius in sa zriva
bistint de luxi faulaxa
truncus de matas spolladas
chi parint monogotis stasius.
In custa poesia, scrita in su 1965, Faustinu s’amostat sa bisura incantada e incantadora chi teniat de su miragulu de sa die chi morit in su scurescidroxu po torrai a nasci in s’arveschida bestendi a pagu a pagu de maxias antigas e de giogus de luxis faulaxas is formas e is coloris de sa naturalesa chi si nci dromit.
Ma sunt medas e medas is maxias de poesias chi hat iscritu.
Infatis est presenti in casi otanta antologias poeticas , de is calis calincuna po is iscolas medias e superioris.
In is urtimus tempus fiat tribagliendi a sa tradusidura de sa Bibbia .
Ma Faustinu no fiat feti unu poeta balente. Fiat puru unu grandu studiosu de totu su chi fiat limba e de is arrexinis de sa terra nosta.
Infatis, pustis de una vida intregada a is istudius, in is urtimus tempus hat donau a sa luxi de is librerias un’ obra de
grandu importantzia po totus is iscientis e apassionaus de sa limba sarda,un’aina in prus po scadenai sa fantasia de is poetas e scritoris e sa gana de sciri de prus a pitz’e sa limba insoru de is sardus de Campidanu (e no sceti).
Cust’obra est s’aciunta de atrus tremila fueddus a su ditzionariu de sardu campidanesu de Vissenti Porru.
Ma s’arrexoni po sa cali, prus che totu is ateras, Faustinu fiat connotu e stimau meda fiat sa balentia chi teniat in su fai s’imparadori.
Infatis, issu chi fiat un’autodidata, est istetiu unu grandu maistu de vida e de limba e de rimas po medas poetas e iscientis a is calis imparaiat totus is cosas chi nci fiant de isciri de sa scritura e de sa literadura, de is arrexinis finzas a is tempus nostus. Infatis,cust’omini, est istetiu s’anima de is iscolas de limba de prus importu de su Campidanu de Casteddu .
Aintr’’e custas podeus arregordai sa Libera Universidadi de Campidanu de Ceraxus , aundi po tempus meda hat trasmitiu totu sa passioni chi teniat a chinisisiat andessit a dd’ascurtai, e s’iscola de limba de s’arruga de is Canelles , me in Castedd’e susu, aundi hant istudiau medas poetas de Casteddu e bixinau.
In cust’urtima hapu tentu deu puru sa fortuna manna de dd’essi connotu e de hai potziu ascurtai e sighiri is letzionis suas e is imparamentus aundi m’hat amostau s’arruga de fai in is versus e in sa vida.
S’arregordu chi tengu de su tempus passau in custu logu no m’hat a lassai mai po cantu hap’’a bivi.
Is aposentus aundi s’istudiaiat fiant una spetzi’’e basciu acant’’e su palatziu de is Boyl, unu de is prus arricus de storia de Casteddu.
Fiat in s’ierru de su 1995 e faiat frius meda, ma sa bintena de scientis chi s’atobiaiat me innia no dd’intandiat.
Sa sabiduria manna de Faustinu fiat unu fogu chi si callentaiat e si faiat intendi unu pagu cument’’e is sotzius de sa Craboneria de sa primu mitadi de s’Otuxentus.
Issu fiat unu maistu prenu de carignu e passientzia e po mei, e seguramenti puru po totus is aterus,est istetiu una ghia de importu mannu in s’arruga de sa sabiduria.
Po custu maistu e amigu sunt nascius custus versus :
