|
24/12/2004 Su dibattu po su Dpef in Consillu Regionale Una perra de limba intrat in su Dpef Eris in consillu regionale manigiu traballosu po sa chistione de sa limba in su Dpef. S'assemblea de bia Roma si fut riunia po approvare su documentu de indiritzu de sa polìtica de su guvernu regionale. Un'emendamentu de sos sardistas Scarpa e Atzeri po pònnere in sos printzipales indiritzos istrategicos de su Guvernu Sardu un'incrementu in su mèdiu periodu de s'impreu de sa limba in s'iscola, medios de massa e amministratzione cun ratzionalizatzione e afortiamentu de is interventos prevedios de sa lege 26/97 no est passau po su parre negativu de s'assessore de sa Programmatzione Pigliaru. Un'àteru emendamentu ( a su puntu 4.1.4. de su documentu programmatoriu) est passau po unu tertzu ebbia. Su de duos e su de tres comma ddos ant craccaos. Su comma chi est passau est custu: <Sos temas de sa limba sarda e de sa cultura identitaria sunt ligaos de intragnas e costituint una prioridade po sa Regione>. No est passau in tames su printzipiu chi sa lege 26 depet èssere adeguada a sa 482/99 e sa netzessidade (giai òbrigada po lege) de unu pianu de polìtica limbìstica de inferrere in su Pianu Regionale de Isvilupu. No est passau mancu s'impignu po garantire sas risorsas finantziarias e su mantennimentu de sos interventos in sa lege 26/97. Rifondatzione (Pisu e Licheri) e Progetto Sardegna (Chicco Porcu) si sunt ischieraos po sa limba e ant votau a favore de unu pianu pro sa polìtica limbistica contras su restu de sa majoria. Grandu ativismu de sos sardistas Iscarpa e Atzeri po sa chistione de sa limba e sinnales interessantes dae Progetto Sardegna, puru si galu contraditorios e non omogèneos. |