Cuncursu in limba sarda
In ocasione de Sa die de sa Sardinna de su 28 de Abrile
In ocasione de Sa die de sa Sardinna, s'Ufìtziu de sa Limba Sarda at pessadu de proponner a totu sas iscolas elementares de Nùgoro un'initziativa pro promoer sa limba sarda comente base de s'identidade e mèdiu fundamentale pro sa cumprensione de s'Istòria de sa Sardinna.
Regulamentu
Podent leare parte a su cuncursu totu sas iscolas elementares de Nùgoro.
Modalidades e tèrmines
Cada classe devet imbiare un’elaboradu chi non devet esser prus longu de duas pàzinas A4, in limba sarda, subra de sos argumentos:
MI DIAT AGRADARE SA LIMBA SARDA CA…
M’AGRADAT SA LIMBA SARDA CA…
Custu isseberu tenet sa finalidade de fagher partetzipare non petzi sos pitzinneddos chi zai faeddant su sardu, ma peri sos chi, pro resones meda, no ant tentu sa possibilidade de faeddare su sardu ma chi lu diant cherrer fagher.
S’Ufìtziu de sa Limba Sarda est a dispositzione de totu sas classes chi cherent azudu pro s’assistèntzia linguìstica e pro s’impreu de sas atrezaduras informàticas in sa sede de carrera Ubisti n. 21.
Pro cale si siat dimanda si podet mutire su nùmeru birde 800.274.644.
Sos elaborados chi devent esser imbiados, intro de su 15 de abrile, intro de sa una, a s’Ufìtziu de sa Limba Sarda, carrera Ubisti n. 21, Nùgoro o cun unu fax a su nùmeru 0784-399123.
Prèmios
Sos elaborados premiados ant a esser letos in Radio Barbagia dae sos pitzinnos su 28 de aprile in ocasione de Sa die de Sardinna e a cada binchidore at a esser dadu materiale promotzionale in limba sarda.
