In s'ulsthimu cunflittu mundhiale, Cagliari fit isthadha sa tzitadhe de sa Salsdhigna sa chi at apidu sos bombalsdhamentos pius mannos e pius feos de tottu sas ateras. Pruite b'isgarrigaiant merces de ogni iscera pro sos solsdhadhos in gherra.
Candho sa situazione lu permittiat sos solsdhadhos los mandhaiant an' dhomo issoro, mancarri pro pagas dies.
Fit su Nadale de su barantaghimbe. Giuanne et Faricu umpare a Antoni fint bennidos a Tzaramonte, sa iddha issoro, cun pagas cosas: unu pagu de mandigu, pietrinas pro sos bricchettes, e calschi ipoglia pro recuperare unu entone a sos pius minores in familia. In piatta b'aiat mesa iddha. Basos e abbratzos cun sos familiares e ateros chi domandhaiant de sos parentes issoro. Solu calschi die in falolsdhias, buffendhe musthatzolu, fae a ribisale e calschi cantu de lalsdhu. Poi su calesse finza a Piaghe, pro leare su trenu "a Castheddhu" naraiant sos campidhanesos. In viaggiu, mesu drommidos, s'ammentu de sas cosas bonas, ipoporendhe sas imbreagheras, ammisciu a su fiagu de su catramu, de sos zigarros tuschanos ei su fumadigu de sa littorina. Candho Furicu dat un'ischuidhadha a Giuanne:….
- Giuà a nondhe falamus in T**** in sue parentes mios?-
- Aijoh!!- cunfrimmat Giuanne.
- Eh no!!- faghet Antoni- Deo mindh' andho in casemma…..
Dae s'isthatzione a pè a T**** et unu drettu de caminu subra a una tumbarella.
Su chindh'enit daeboi no esth'ateru chei sa continuatzione de sos fattos de iddha nosthra. Basos e abbratzos dae tottu, connotos e nono….. inque puru s'isthranzu est bene cumpridu. S'improvvisant duas boghes, et cun cussu sonu su ballu tundhu, in mesu a sos carradellos boidos, ateros pienos e cadreas chi fint' isthadhas impazadas. Su sonadore de sa chiterra chenza duas colsdhas, ma tantu inigheddu lichittu chi pariat rosoliu.
S'imbreaghera noa at agatadhu sa etza, e tra boghes in re e buglias maccas si ch'est fattu manzanile.
Dae sa ventana qusthu lugore troppu jaru, et cussu mudore azigu isthrambu. Su notte haiat fioccadu…..e fiocca!!!!! Alstha finza a benuju.
Sa felstha si che fit mesu addrommentida, ma cun cussu nie fora e duas tatzas de gaffè de olszu turradu, unu bicculu de panuntu e duas olias cunfettadhas riprendheit pius allegra e'prima cun binu polsthu a palsthe pro sa bonas occasiones.
Un'atera die e unu notte in trullallera, chentza pensare nen a Cristhos nen a Santos.
Dae s'appusentu s'accerat tiu Antoni Maria cun su zigarru a fogaintro e bene intzamarradu chi a boghe ipallatadha tronat….
-Como basthat piseddhos!!!, sa festa est finida!!!- Pristhu a leare su trenu pro Cagliari-!! -Cagliari? Castheddhu?-
In sa caveddhera b'aiat de tottu francu che Cagliari. Daeboi de tantu Nos presentamus in sa casemma. Non b'aiat guasi niunu. Sos pagos tottu impressados e lesthros s'addhobbaiant appare pighendhe e falendhe e aintro e bessi.
-Chi siete voi due?-
-Eraviamo del settimo battaglione!!-
- I vostri compagni sono partiti!! Aggregatevi agli altri in fureria.
Sa compagnia nosthra fit palsthida pro Anzio ue bi fit isthadhu su grandhe isbarcu.
Antoni e ateros giovanos che moreint inie cun ateras mizas de solsdhadhos, chi forsi dae Subra sos chelos Nos sunt abbaidhendhe.
P.d.I : sos contos chi Bos mando non sunt mai isthadhos pubblicados ainfora de su situ meu www.archeologosardos.it
Tzaramonte, Sàpadu su seighi de Abrile de su duamizaechimbe
