B’at sa Rezone chi tagliat sos finantziamentos a sos gruppos folkloristicos, coros a tenores e tradisciones populares de sa Sardigna, e b’at a s’imbesse s’Assessoradu a su Isviluppu Economicu de su Comune de s’Alighera ghiadu dae Francu Simula, chi su dinare lu gastat pro imbentare o criare unu ‘estire populare de sa tzitade catalàna totu nou.
“Questione di punti di vista” at a narrere calicunu, ma fintzas dae custa cosas si cumprendent s’importantzia chi sa politica dat a sa cultura sarda.
S’Alighera, no pro su turismu ebbìa, at detzisu de cunfidàre a subra s’immazine sua, e pro custu s’Amministrascione comunale at agiudadu a giompere a custu resultadu. Sos estires de s’omine e sa femina leant ispuntu dae cussos de s’Ottochento e sunt istados criados dae sa sarta Brigida Langella cun s’agiudu de istudiosos e amantiosos de sa cultura catalàna de s’Alighera. Tzertu no ant a essere propriu sos originales ma ant a essere estìdos in sas manifestasciones de promotzione de S’Alighera.
