01/04/2005 Cumproas de ispantu in sa televisione sarda
Videolina, sa Ruta e s’indipendentismu de is sardos
de Peppe Corongiu
Pariat una trasmissione de nudda. Normale. Fintzas unu pagu "provintziale". Videolina, 31 martzu 2005, oras 9 de sero. “Sardegna chiama Italia”: presentat sa torinesa Maria Teresa Ruta. Ospites de sa sa tzarra fitiana polìticu-impresariale-culturale: Cogodi, Aloi, Biggio, Casula, Pino Careddu e àteros de prus pagu contu. Regia de Beppe Passavanti, camera de Paulicu Carboni. Foras de istùdiu, in su monitor dae su satellite, unu iscuriosu Gavinu Sale, leader de Indipendentzia Repubrica de Sardinnia, bestiu de birde e nieddu antitelevisivos.
Pariat “Porta a Porta” de Bruno Vespa acrobada a sa sarda. Cosa de s’orròschere e cambiare canale. Totuinduna, sa meravigia. Sa pilibrunda torinesa giaet sa nuntza de una cumproa-sondaggiu a pitzu de s’ipòtesi de una Sardigna indipendente. Ispantu: su 43,9 % de is sardos respondent ca emmo. Custos sardos pensant chi s’isula, si esset istada indipendente, nche dda podiat fàere a bìvere sena s’Italia. Aus cumprendiu male? O est propiu gasi?
No. Est pròpiu gasi. Calencunu de sos italianistas presentes chircat de cuntestare sa cumproa-sondaggiu. Nudda de fàere: est una sotziedade milanesa ispetzializada chi dd’at fatu. No ddue at peruna duda a pitzu de su resurtau. Mengius chircare de minimare su dannu. Ddue provat Cogodi, Aloi e fintzas Frantziscu Cesare Casula. Ite làstima su chi ant nau. Mengius a lassare pèrdere. Una birgonza: sa prova ca su natzionalismu colonialista italianu est in intro de sa conca de sas classes ghiadoras meda de prus de cantu non siat in su pòpulu. Sa prus « sarda » (mancu a ddu nàrrere faet…) fut sa Ruta. Istranza, e duncas, sena interessu perunu de cuare sa realidade de sos datos.
Mengius de totus Gavinu Sale, fintzas cun sos limides chi tenet. Chi non sunt pagos. Faet fintzas cumplimentos a Soru (chissai poite?), su presidente chi foeddat de identidade e natzione sarda ma finantziat lìrica e jazz cun su dinare de sa limba (gosi naraiat unu sms imbiau in unda). Ma a su nessi Sale bogat a craru pensamentos làdinos: soberania, indipendentzia, autodeterminatzione.
Sighit sa tzarra de is àteros ospites sardos dessardizados o fenicizados. Ma a sa fine de sa puntada lompet un’àteru sondaggiu scilibridore, cundiu de intervistas fatas a furriu, chi lassat trinios a totus. A sa prengunta: ti intendes sardu o italianu? Su 60 e prus po chentu respondet ca si intendet sardu e non italianu. Ite cosa bella!!! Gasi pensant a beru sos sardos? E tando proite semus gasi postos male? Proite a dogni campagna eletorale si nche lassant samunare sos cherveddos dae sos partidos fenicios?
Ma it’est custa pampa chi s’est pesada? Chietos piciocos. Accò s’istudafogu. Unu fulanu Porcu, responsabile de sa CNA, narat, tzitando no isco e chie: <Il patriottismo è l’ultimo rifugio del manigoldo>. Frasia, giai intendia, de unu basciumene inteletuale piticu gosi. Chissai de chie dd’at intendia (…tengio una duda…) e si balet po totu is patriotismos o po cussu sardu ebbia? (…tando Ciampi, su babbumannu de su patriotiotismu italianu, comente ddu depet mutire?). Ma a cuss’ora su dannu est fatu. No ddue at remediu.
In capas, de cras no at sutzedere nudda. Polìtica, informatzione e sotziedade no si nd’ant a acatare de nudda. Perunu tìtulu in prima pàgine po comente dda pentzant sos sardos. Po nois, chi ddue credeus in s’identidade, un’ispera in prus. Ma cherio torrare gratzias a Videolina po una serada chi no aus a ismentigare tantu a sa fatzile.
