Is giornalis isolanus e is mass media in generali, oindi’ sunt tottus perfettamenti allineaus. Chi bolit narri ca iant a bolliri pretendiri de fairi cultura sarda faendi de mancu de sa lingua sarda. Ma comenti est possibili? Bisongiat a essiri zurpus o maccus o in mala fidi. Basta cun s’isola tottu soli e mari narant, depeus proponniri sa cultura sarda a is turistas po unu turismu prus intelligenti! E inzandus s’amostrant ita est sa cultura sarda vera. Provai a inzertai. Giustu! Eis inzertau. Festival de “Jazz” e su Teatru Liricu de Casteddu, de is calis ddis interessat fetti chi ndi fueddint is giornalis continentalis e si fazzant intendiri parti de sa grandu famiglia italiana, chi s’arriccit a brazzus obertus si seus prontus a cambiai peddi. Cosa de aicci si liggit in is giornalis sardus, pofinzas in is nous appena bessius. Intervistas a s’assessora Pilia chi narat sempiri is solitas cosas, ca sa cultura est troppu importanti, ca toccat a fairi “sistema”, a calendarizzai, destagionalizzai, differenziai, catalizzai is flussus turisticus, investiri in is servizius, esaltai sa specificidadi, catalogai is benis, professionalizzai, migliorai, valorizzai sa cultura nostra insomma, ita est sa cultura sarda po s’assessora noa ge dd’eus bistu. E podiat mancai s’opinioni de s’antropologu “contro”? Zertu ca no, mai manchit! E duncas Giuliu Angioni si ponit in guardia contra is perigulus de sa “folklorizzazione” e si regordat ca “L’abitante di Tonga quando vede il turista balla col gonnellino” e custu est su chi bolint fairi is sardus oi, ma custu “Ci allontana dall’orbita occidentale e ci avvicina al terzo mondo”. “Si discute sui giornali della lingua e della preistoria della Sardegna...ma è chiaro che chi ha un’istruzione medio bassa non è interessato a questo...fare esperienze di parlate locali interessa pochi”. Custus fueddus sunt pigaus de una rivista noa chi s’affacciat a su mundu editoriali sardu, “Godot News”, dirigia de Vito Biolchini, una rivista fatta beni e interessanti chi s’auguraus pozzat donai sempiri prus spaziu a sa lingua sarda.
Depeus essiri internazionalis insomma, e po fairi custu naturalmenti depeus fairi finta de non essiri sardus. Sa cultura sarda po zertus est fetti sfiladas in costumini, cursas a cuaddu o simbilis, chi sbuidadas de s’elementu prus importanti, sa lingua est a narri, sunt diaderu ballus de Tonga e in custu dongu rexoni a G. Angioni. Ripittu, comenti si podit pretendiri de fairi cultura sarda sbuidendidda de sa prenda prus luxenti de tottu su scusorgiu? Sa lingua est sistematicamenti evitada, no si ndi chistionat mai, comenti chi non nci fessit, discriminazioni assoluta, ignoranza totali. Poita sa lingua no dda connoscint, comenti si podit stimai una cosa chi no si connoscit? E candu dda connoscint dda timint ca no dda podint controllai, e non nci guadangiant nudda. Ita ndi ddi podit importai a unu chi at investiu tottu sa vida sua in s’italianu de sa lingua sarda? Nudda, poita si iat a depiri ponniri a dda fueddai o dda studiai? Est craru chi at a fairi de tottu po dda evitai o candu podit po dda streccai, appettigai e ridicolizzai, narendi chi est un’operazioni nostalgica o sa pauria de su progressu e àteras tontesas de custa genia; est una guerra de poderi nudda de prus. E sigomenti s’agattat ancora calincunu maccu chi su sardu ddu fueddat circant de ddu cuai, donendi diaderu, aicci si caru Angioni, un’immagini de baddadoris “in gonnellino” ddi zerriat Fostetti.
In perunu giornali sardu, de is tres prus mannus, si ddoi pubblicat cosa in sardu, is televisionis regionalis mancu a ndi fueddai, in su radiu pagu e nudda, is trasmissionis de is novidadis in libreria pagu a su propriu. Ca cussas puru sunt guidadas de intellettualis de estrazioni urbana, pagu interessaus a is chistionis de sa lingua. Censura cumpleta a sa lingua sarda duncas, a is scittoris in lingua e a is operas insoru chi no connoscint o no cumprendint e no sciu ita siat peus, e su bellu chi bolint fairi cultura, zurpus comenti sunt. No bisongiat nimmancu sighiri ca eis giai cumprendiu de ita seus chistionendi. Po imoi ddoi sunt custus sezzius in is scannus de su palazzu regionali e toccat a fairi is contus cun custus. E bravus is progressistas urbanus e is scrittoris in italianu chi si scint agattai is canalis giustus. No dd’estis notau? In tottu su chi organizzant ddoi est sempiri Angioni, o Pilia, o Cerina, o Soru, a bortas tottus is quattru. Chini est scidu e si scit moviri si circat is amicizias giustas po dd’aggiudai a mandai innantis is fainas suas e chini est dormiu, s’arrangiat! E sa Regioni Sarda finanziat. Ma attenzioni, podeus narri puru chi siat curpa de is scrittoris in lingua, segundu comenti dda bis.
A custu puntu seus, non pensamu mai de ddu depiri narri, ma comenti mi mancat a mei Beniaminu Scarpa! A su mancu unu pagu de sensibilidadi prus sincera dd’iat ammostrada. E inveci pitticca sa delusioni sa giunta de sinistra! A ca s’identidadi fiat unu valori, finzas economicu, e dd’eus bistu su valori, bella frigadura!
Custa est s’identidadi sarda po mass media e guvernantis, nudda de prus de unu croxu sbuidau e pintau po nci ddu portai a continenti custa borta, ex “pinta la legna e portala in Sardegna”, beccia pigada po culu po is sardus molentis, zeraccus e tontus.
E tottu po si ingraziai su tirannu nou de su seculu nostru: su turista.
