In custos urtimos tempos mi est capitau de mi iscriere cun zente chi istat a largu de sa Sardinia. Apimos faeddau de lingua sarda e de totu sas proponidas chi suntis bessias in fora in custos urtimos annos. Sos chi iscridiant de s’attera parte fiant in Germania, terra chi at bogau meda istudiosos de limba comente su biadu de Wagner.
Meda de sos istudiodos chi suntis in fora e non suntis naschios in Sardinia non cumprendet puitte sos sardos si che suntis furriande a sa proponida de LSU. Sos linguistas a bortas si frimman a istudiare sa fonetica, su lessicu, ma non abbaidant sa sotziedade. Non abbaidant s’istoria de sa sotziedade, non intrant in sos tzilleris e in sas domos pro iscurtare su chi narant sos sardos e non comente ddu narant.
Si si fiant frimmaos unu pagu aiant cumprendiu chi sa LSU atteru non faghet chi bogare a pizu cussa gherra betza, naschia in tempu de famene e de dominatziones, chi at bistu sos campidanesos contra ‘e sos cabu ‘e susesos. Sos pastores e sos massajos, podimos narre, generalizande unu pagu.
In su 2005 sos effettos de cussa cuntierra si bient ancora!
E su fatu chi custa cultura siat abbarada si narat duas cosas: sa prima est chi, mancari s’urbanizzazione, non ddu est istetia un’attera cultura chi si siet posta in su populu in pitzu de custa, sa de duos est chi sa dominatzione culturale italiana est andande bene (pro issos). Sa diversidade a intro e sos duos cabos (chi pois est una sintesi legia meda e isbagliada puru) est cussa chi est istada imprimida prima de sos fenicios.
Diversidade chi est torrada a nudda cando su Juighe Marianu gherrait cun Don Pedro s’aragonesu, chi non s’intendiat cando sos sardos ant frimmau sos frantzesos in Casteddu in su 1794. Cando su popolu si intede Natzione, sa differentzia (minima o massima) est una cosa bona, cando su popolu est juttu a su tzugu e tenet sos ogos serrados, assora custa differentzias servini a si faghe gherrare pro unu cantu de pane. Tando si calicunu depet bogare una proponida pro sa limba sarda chi ddu fetzat penzade a sa natzione de oe, non a sa connottu de deris.
