"...e unu bellu etagére in istile liberty, fattu dae mene prenu prenu de bellos libbros iscrittos dae sa zente nostra, siat in italianu che in sardu, sa bella limba nostra beridera chi non at a morrer mai".
Bustianu Murgia "S'arte e sos laribiancos" Lìtera a Tziu Frantziscu, Condaghes.
Fueddus de ispera cussus de Bustianu Murgia, maistu de linna nugoresu, sonadori e iscritori po passioni mortu prima 'e s'ora traìxiu de su coru suu malàdiu. At acutu perou a si lassai unu libbru in forma de lìtera a Frantziscu Màsala, chi a mei m'est partu luegus de ispantu. Opinioni mia, po caridadi.
Curiosu cumenti giai de is primu duas arrigas ti nd'acatis. "Custu est bellu" apu pensau candu dd'apu obertu sa primu borta e no mi seu sballiau. It'est intzandus sa bellesa de custu libbru? Sa scritura lèbia, su contai de sa Nùgoro de intzandus, de sa picinnia sua, ma chena de si nci lassai pigai de su contu "de s'arregordu" de su "cumenti femus e no seus prus". Est una mirada prena de poesia a sa vida de is ùrtimus de sa bidda e de sa vida, is pòburus chi prus pòburus no fait, "sos laribiancos" dd'iat a nai Tziu Frantziscu "Cicitu" Màsala. Una mirada pronta a nci ghetai sa butada spassiosa cumenti a sa stocada, candu serbit, contras a "sos matimannos". E pròpiu a Tziu Cicitu dd'apu assimbillau, ("Sa limba est s'istòria de su mundu", Condaghes) po sa manera sua de iscriri e su contai "disincatau" ddi naru deu. E beni at fatu Tziu Cicitu etotu a iscriri: "Custu de Bustianu est "Il giorno del giudizio" de sos pòveros de Nùgoro", i est berus, antzis a dda contai giusta a mei m'est pràxiu de prus puru! Làstima chi s'agatit pagu cosa pubblicada de Bustianu Murgia (antzis Murja, a sa nugoresa) ma sceti custu libbru at a bastai, sèmpiri in su parri cosa mia, a ndi fai unu nòmini arrispetau in su mundu, piticu, de sa literadura in lìngua sarda.
Àteru libbru chi mi praxit a si cunsillai est "Sas gamas de Istelai" de su bitzichesu Albino Pau, Condaghes. Albinu Pau est unu personàgiu curiosu, a primu intrada parit unu pagheddu murvonatzu e nàrat sempri chi su sardu si no est giai mortu est morendi, e invècias a ddu connosci est un'òmini geniosu e iscrit sempri in sardu!
Custa pubblicatzioni est una imprentada noa de unu lìbburu giai bessiu unus cant'annus fait, imoi currègiu in sa grafia e torrau a proponni a su pubblicu sardu. Una bella pensada, ca su libbru ddu merescit e nci est su tanti, cumenti si nàrat.
De s'idea macoca de is tallus de brebeis chi pascint in su sartu de Istelai e chi una bella dì in logu de su “sòlitu” lati incumìntzant a bogai ciuculati de is titas insoru, nascit e si svilùpat su contu. Spassiosu diaderus e prenu de imbentus; e nci tengu a ddu nai. Po mei a ddi nai spassiosu a unu scritori est unu de is mellus cumplimentus chi ddi potzaus fai. E no seu esagerendi, ca s’arti de ispassiai cun gustu, chentza de nci depi arrui in iscimpròrius est un’arti etotu e mala a manixai puru. Ma candu nci est, bisòngiat a dd’arreconnosci. “Ironia” iat a tocai a ddi nai, e fini puru, ca ddi dexit de prus. Unu libbru chi si làssat ligi cun grandu prexeri ca est finas beni scritu e no ddi scarescit nimancu de pungi a istrumbu is bascesas de is òminis tropu abbramius e atacaus a su dinai fàcili.
Unu “bravu” a s’editori puru, chi tòcat a ddu nai est unu de is prus chi funt investendi, energias e dinai, in sa literadura in lìngua sarda. E cun professionalidadi. Aici totus.
