Dae chenabura su primu de aprile, “Llunari” est sa rubrica noa, tota in limba catalàna, fatta dae sos istudentes de s’iscolas media numeru 1 e 3 (plesso de sas carrelas Tarragona e Malta) de s’Alighera cun s'azudu de s’emittente televisiva “Cinquestelle Sardegna”.
In “Llunari” sos istudentes ant trabagliadu gratzie a unu progettu pro sa valorizzatzione de sas limbas de minorìa.
Antis sos pitzinos ant istudiadu, cun libberos iscritos dae calchi autore de su logu puru, tradisciones, storia, paristorias, proverbios, ritzettas de coghina de sa cultura saligheresa.
A pustis, in domo, e cun s’agiudu de sos ‘iaios o pessonas ‘etzas, ant potidu intendere in realidade sa limba e sa cultura de su tempus passadu.
Su passu a innanti de custu progettu est istadu s’applicatzione de sos insinzos chi sos alunnos aiant imparadu cun s’impitu beru e cuncretu de sa limba. Faeddandèla e fattende cun sa limba de sos iaios sa piùs cosa moderna chi b’at: sa televisione.
Su fine de su progetu fit propriu custu, de istimolare sos pitzinnos a impitare pro cantu pius possibile sa limba catalana, no in s’iscola ebbìa, ma fintzas in domo o in ateros logos. Totu custu pro ischidare s’interesse a sa limba fintzas in sas familias, lezende, intendende e imparende a l’iscriere puru.
Sa rubrica at a essere in 24 puntadas in intro sas duas edisciones de su tg locale, a mesudìe e a su sero.
Sos alunnos ant a contare, in pindulas, tradisciones popolares e notiscias istoricas ligadas a su mese, maneras de narrere, e ritzettas de s’Alighèra tottu in catalanu.
Faghimus sos cumplimentos a sas professoras Claudia Bellodi, Rosina Carta, Paola Canu, Silvana Nulvesu, Maria Sanna, Carla Valentino e Remundu Pitzolu pro custu progettu interessante meda.
Bisonzat de narrere chi custa no est sa prima inisciativa de sas iscolas de S'alighera. Est de su mese de triulas (luglio) de s’annu passadu chi a pustis de sa frimma in sos attos ufitziales de s’amministrascione comunale e sa Generalitat del Catalunya, at apidu comintzu sa collaborascione intra sas duas Istitusciones pro sa promoscione de sa limba catalana in s’Educatzione.
In su mese de Sant'Andria sèmpere dae s’annu coladu, pro more de unu “protocollo d’intesa” intra sas mantessi Istitusciones, in s’iscola materna de S'alighera s’ insizat su catalanu a sos pitzinnos minore.
B’at de narrere chi s’inisciativa de s’impitu de sa limba catalàna in sa televisione in S’Alighera no est sa prima. Infattis “Llunari” giompet a ses meses dae sa naschida de “Catalàn Tv”, sa televisione s’Aligheresa comporada dae Riccardo Giorico, e chi trasmettit unu palinsesto in catalanu ebbìa.
Sos s’aligheresos a difendere s’ identidade issoro bi tenent!
S’ispera est chi pro sa limba sarda puru su camminu siat gai, e calchi imprenditore “illuminato” potat seberare de gastare dinare pro unu canale digitale tottu in limba.
