|
01/04/2005 Làconi, cunvenniu de non mancare Limba de Mesania e Internet Est in programa po sàbudu chi enit su 2 de su mese de abrile, a sas chimbe de merie, in Làconi (OR), in su tzentru culturale comunale, su cunvenniu ““Su sardu: limba de vida, traballu e guvernu. Sa proposta de Limba de Mesania”. Cuncordat su Sòtziu Limba Sarda, cun s’agiudu de su Comunu e de unos cantos sòtzios culturales lacunesos. A pustis de su saludu de s’assessore Fausto Fulghesu, at a foeddare Peppe Coròngiu, lacunesu, ghiadore de su Sòtziu Limba Sarda e fundadore de su primu isportellu limbìsticu in Sardigna, in Cuartu Sant’Aleni in su 1999. A vatu, s’ant a pòdere intèndere is relatas de Maurìtziu Virdis, maistru de filologia romanza e limbìstica sarda in s’universidade de Casteddu, Mariu Puddu, autore de su ditzionàriu de sa limba sarda e maistru de s’ateneu casteddargiu, Frantziscu Cheratzu editore, Micheli Ladu e Simona Coròngiu, chircadores universitàrios. Sos triballos s’ant a isboddicare po s’umprus a pitzu de is argumentos fitianos de s’unificatzione limbìstica e de s’afortiamentu de sa limba cun sos mèdios informaticos e internet. At a èssere illustrada sa proposta de Limba de Mesania, alternativa reghente a sa meda atragagiada “Limba Sarda Unificada”, torrada a propònnere dae sa provintzia de Nùgoro pustis chi sa Regione matessi dd’iat botzada. S’ant a presentare fintzas Diariulimba (revista digitale de su Sòtziu Limba Sarda), Iscolimba (cursu de autoformatzione in sardu in internet) e su curretore ortogràficu de sa limba sarda cuidadu dae Frantziscu Cheratzu. At a cungiare is treballos Paolo Ignatziu Pisu, sìndigu e consilleri regionale. |