Sos giornalistas puru, balla, za sezis curiosos: bastus de fàghere "colpo" e ite no abbunzades! "Limba sarda vittima dei dilettanti della cultura" (Gds 06/08/05, p. 6): su giornalista aiat fatu menzus a fàghere cumprèndhere chi sos "dilettanti della cultura" sunt nessi cudhos chi bi ruspint apitzus de sa limba sarda, e no cudhos, comente paret, chi fintzas a costu de sacrifítzios mannos si ndhe interessant pro su bonu e no pro che l'irbandhonare che arga de muntonarzu. Postu fintzas chi custa "arga¹ sunt sos "atores" chi faedhant in sardu e no sa limba (chi si ndhe afutit de "dilettanti" e de "professionisti"puru).
Ma proite, caru Michel Contini, no naro unu Giuanni Lilliu (chi pro sa dignidadi de is Sardus, de sa Sardigna e de sa língua sarda at impegnau sa vida e is istúdius), ma fintzas solu Nighele, Bodale o Fulanu "parlano di limba senza sapere cosa dicono" e "quando parla in sardo non parla in limba ma in lingua"? Solu ca tue cunfundhes limba cun limba uficiale? Custa cunfusione istaiat meda menzus in buca de unu calesisiat innorante e no in buca de unu docente universitàriu.
A bi pessare bene chie no ti at finantziadu cussu "progetto" de 1.200 milliones pro colare "ai raggi X" totu sos sonos chi faghimus sos Sardos (solu in limba, eh!) at fatu bene a no lu finantziare, ca de pistadores de abba in Sardigna che ndh¹at a fuliadura e prus de ³bla bla² no ndhe bogant àteru de limba sarda e ne de àteru e in sardu no ponent mancu duas peràulas paris ca no bi sunt bonos o ca l'isputzint puru. E tiat fàghere bene fintzas su Presidente Soru a no finantziare sos pistadores de abba (e mancari menzus chi finàntziet "professionisti" pagados a tres milliones a die, menzus puru si no sunt sardos ca sos de fora ndhe ischint de prus e fintzas ca nois Sardos, e Soru puru za est sardu, semus "ospitali"). Zuto su fele, su fígadu, s'isprene e sos prummones ufrados, ma su sole bi est ancora.
Mario Pudhu, Santuanni Suérgiu
